Mazlûm Ebdî: Ahlam Albashire Helebij a û têkilîya ci bi DAÎŞî esta

• Fermandarê Pêroyî yê QSDyî Mazlûm Ebdîyî dîyar kerd ke, 3 birayê Albashire DAÎŞî mîyan de merdê û yew birayê ci zî fermandaranê çeteyanê Efrînî ra yo.

Fermandarê Pêroyî yê QSDyî Mazlûm Ebdîyî, rojnameyê Al-Monitorî rê qisey kerd û dîyar kerd ke Ahlam Albashir a ke sey hêrîşkara Taksîmî ameybî girewtene, Hebebij a û têkilîya keyeyê ci bi DAÎŞî esta.

Mazlûm Ebdî dîyar kerd ke, yew birayê Alham Albashire Reqa de, yew Minbîc de yew zî Iraq de DAÎŞî mîyan de ameyê kiştiş û yew birayê ci zî mîyanê çeteyanê Efrînî de fermandar o.

Mazlûm Ebdîyî, persê ‘Şima vanê hêrîşa Taksîmî ra kam berpirsîyar o?’yî ser o nîya cewabê xo sa:

“Goreyê mi no provakasyon bi û seba ke hêrîşa ma bikerê hetê Hukmatê Tirkîya ra ame viraştene. Ma xeylê cigêrayîşî kerdê û ma rasayê na netîceye ke hêrîşe hetê çeteyanê ke Tirkîya paştî dana înan ra ameya kerdene. Ma tespît kerd ke, cinîya ke ameya tepiştene DAÎŞî de têkildar a û ez nê malûmatî reya verêne dana çapemenîye. 3 birayê aye mîyanê DAÎŞî de merdê. Reqa, Minbîc û Iraq de ameyê kiştiş. Yew birayê ci zî mîyanê grûbanê Efrînî de fermandar o. 3 endamanê DAÎŞî de zewicnaye ya û Helebij a. Hêrîşa Taksîmî de eleqeyê ma çin o û polîtîkayê ma yo winasî zî çin o.”

Ebdîyî dîyar kerd ke, gefanê Erdoganî cidî genê û va, “Bitaybetî eke hetê Amerîka û Rusya ra gamî meyerê eştene, Tirkîya do erdî ra zî hêrîşanê xo biramna.”

Ahlam Albashire zî îfadeyê xo de vatibi birayê mi mîyanê OSOyî de merdê.

NAVENDA NÛÇEYAN