Netîceyê şewatê Licê giran ê

în 7 tebaxê 2020 - 11:36

  • Şewatê Licê yo ke 5 rojan dewam kerd bi sebebê netîceyan ê giranan. Şewat de bax û baxçeyî wel bîyî û hele mende ke keye û axûrî zî bivêşî.

28ê temmuze de mabênê taxanê Derxûst, Sisê, Cinezûr, Henyat û Cimarî de şewat vejîya û şewat 5 rojan dewam kerd. Hêzanê dewlete mudaxeleyê şewatî nêkerd. Şewat bi xîretanê hemwelatîyan gêrîya binê kontrolî la rîyê vayî ra reyna geş bi. Hemwelatîyan 5 rojan ra dima şewat hewna kerd la bi hektaran erazîyî wel bîyî. 

Şewat de bax û baxçeyî wel bîyî û Goristanê Sisê zî vêşa. 

Hemwelatîyanê Sisê yê ke bi heywankarî û rencberîye debarê xo kenê, qala şewatî Ajansê Mezopotamya (MA) rê kerde.

Emîne Akdemîra 73 serre vat: ''Birayê mi û domananê ci ma xelisnayî. Ma ra berî çewî xîret nêkerd ke şewat hewna bikero. Şewat de 18 gozêr, 56 sayêrî, erazîyê min ê tutunî, 100 lître şitê mi vêşayî. Zerarê ma zaf o. Adir senî kewt ta ma aye zî nêzanenê. Ma têna wazenê ke wa heqanê zerarê ma bidê.''

Recep Bayram heywankarî keno. Bayramî vat: ''Ez dima pê şewatî hesîyaya û cade ameya dewe. Mi 150 dewar û astorê xo xelisnayî. Pêro dewijan xîret kerd ke şewat hewna bikerê. La baxçe û erazîyê ma pêro vêşîyayî. Ekîpê şaredarîye û îtfaîya erey ameyî. Şaredarîye zî têna yew wesayîtê şewatî şawitbi.''

Roniştoxanê taxe ra Ramazan Bulut (53) îfade kerd ke têna dewijan şewat hewna kerd û vat: ''Têna wesayîtêk senî eşkeno şewat hewna bikero? Bax û baxçeyê ma pêro wel bîyî. Ez nêzanena şewat senî vejîya la her serre tîya de şewat vejîyeno. Ganî seba zerarê ma ma rê hetkarî bikerê.''

Muxabîrê MA wexto ke Sisê ra agêrayêne hetê cendirmeyan ra ameyî vindartene û leşkeran solê înan payî ra vetî. 2 muxabîrî heta pûncanê xo cigêrîyayî. Muxabîrî dima agêrîyayî Amedî.

ANF

parvê bike

   

Yeni Özgür Politika

© Copyright 2020 Yeni Özgür Politika | Mafên belavkirinê parastî ne.