Licê de eynî ca de hîrê reya ke şewat vejîyeno

Şewat bi mudaxeleyê dewijan ame hewnakerdiş û dewijan dîyar kerd ke erey mudaxele ameyo kerdene.

Mehleyanê Licê yê Entax, Gom û Bamitnî de çend rojî ra ver şewat vejîya û bi mudaxeleyê dewijan ame hewnakerdiş. Mîyanê aşmêke de eynî ca de hîrê rey şewat vejîya. Vizêr rayberîya Hereketê Ekolojîyî yê Mezopotamyayî de heyetêk şîyê mintiqaya şewatî û hetê înan ra cigêrayîşî ameyê kerdene. Dewijan dîyar kerd ke şewatî rê erey mudaxele ameyo kerdene.

‘Îtfaîye rew biameyêne kilî vila nêbîyêne’

Welatîyan ra Emîn Yaylikî va, “Îtfaîye heta ame kilî vila bîyê. Ma zor xo xelasna. Destê ma veşayê. Adir ke rasa gilê koyî hinî kontrol ra vejîya. Eke îtfaîye rew biameyêne ma eşkayêne hewna bikerê. Seba ke awe çin bî ma bi leman kerdenê ke adirî hewna bikerê.”

Eynî ca de hîrê reya ke şewat vejîyeno

Yaylikî va, “Di keyeyê merdimanê ma veşayê. Merayê ma veşayê. Eynî ca de hîrê reya ke şewat vejîyeno. Ê verênî hîna rew ameybî hewanakerdiş. Ma nêzanê şewat çira vejîyeno. Seba ke ma kesî nêdîyo ma nêşkenê çîyêk vajî.”

Goreyê malûmatan hema zî ca-ca şewat dewam keno û seba ke xebata serdinkerdişî nêbîya zî tayê cayan ra dû beno berz.

MA / AMED