Nuşte û mektubê ke kadroyanê ronayoxan ê PKKyî ra Mehmet Hayrî Durmuşî Zîndanê Amedî de nuştî, bi destê weşananê Serxwebûnî weşanîyayî.
Mehmet Hayrî Durmuş 1955 de Çewlîg de yeno dinya. Fakulteya Tibî yê Hacattepe serra hîrêne de caverdeno. 1973 de tewrê Têgêrayîşê Azadîye yê Kurdan beno. Kongreya Ronayîşî yê PKKyî de ca geno û sey Endamê Komîteya Merkezî yeno vîjnayene. 1979 de Qoser de yeno destbendkerdene û Mehkemeya Îdareyê Pêtî yê Dîyarbekirî de sey Endamê Komîteya Merkezî ya PKKyî pawitişê sîyasî keno. 14ê temuza 1982yî de vera îşkenceyan pîya bi 9 embazan Xoverdayîşê Rojeyê Mergî rêxistin keno û mîyanê çalakîye de ca gêno. Mehmet Hayrî Durmuş 12ê êlule de şehîd beno.
Badê 41 serran mektub û nuşteyê Mehmet Hayrî Durmuşî yê zîndanî sey kitabî hetê weşananê Serxwebûnî ra ameyî weşanayene. Nê mektuban ra yew xeylê balkêş o. Durmuşî 25ê kanûna 1980î de keyeyê xo rê wina nuşto: “Senî ke her cayê dinya de beno, ez zî sey kesêkê wezîfê û berpirsîyarîya xo zano, semedê xelisnayîşê şarê xo, xoserîya welatê xo tewrê têkoşînî bîya. 1973yî ra heta 1979î ez xebitîyaya. 30ê kanûna 1979î de ez hetê polîsanê tirkan ra esîr ameya girewtene. Ez inkey pîya bi seyan hemrayan û bi seyan merdimanê welatperwer û demokratan Hepisxaneyê Leşkerî yê Dîyarbekirî de ya. Ez 7 serrî xebitîyaya. Beno ke no wext şima rê zaf bêro la qeybî merdimê sîyasetmedarî yo ke wazeno semedê şorişî zaf çî bikero zaf tay o. Roja verêne ke mi dest pê têkoşînî kerd ra zana ke xelisnayîşê welat û şaran çend aşme û serran de nêbeno.
Reyna ez mîyanê têkoşînî de zaf hole mûsaya ke; xelisnayîşê Kurdistanî û şarê ma karê neslan o. Ez zî sey hemrayanê xo yê bînan bi azmê têkoşînî dekerdebîya. Mi waştêne ke ez hema bi serran têkoşîn bikerî; la ez ameya tepiştene. Seba ke ez têkoşînî ra kewta dûrî, ez qehrîyena la wexto ke ez vînena şarê ma senî yeno qetilkerdene, raştê îşkenceyan yeno kîn û hêrsê mi zêdîyeno. Bawerîya mi ya şorişî xurtêr bena. Ez do bi heme bawerî û azmê xo têkoşînê xo bidomnê. Zîndan de zî ez do semedê hemra û şarê xo têbigêrê.
Ez pîya bi hemrayanê xo Kurdistanî ra gêraya û mi problemê raştî yê welat û şarê ma hol fam kerdî. Seba ke kesê bînî zî fam bikerê, çîyo ke destê mi ra ame mi kerd. Senî yeno cahîl verdayene, yeno perîşankerdene, raştê qirkerdişan yeno, çimeyê ma yê zengînî senî yenê talankerdene, ziwan û kulturê ma senî yenê texrîbkerdene, şarê ma senî vêşan-têşan yeno verdayene û sey koleyan Stenbol, Adana, Hatay û bajaranê bînan de yeno xebitnayene, mi sebebê nînan heta eşkaya vatî. Mi şarê ma rê îzah kerd ke berpirsîyarê nê heme xirabîyan kolonyalîstê tirkî û kurdê xayînê ke xizmetkarê înan ê…”
XWEBÛN
