Qetlîamê Dîgorî: Zîhnîyet ney kerdoxî vurîyayê

Nûçeyên Rêzexeberê

yekşem 14 tebaxê 2022 - 16:21

  • Qetlîamê Dîgorî ser ra 29 serrî vîyertê. Sîyasetmedar Mehmut Alinakî va, “Zîhnîyeto qetlîamkar nêvurîyayo.”

14ê Tebaxe 1993yî de Dîgor de şar vera tehta, zulim û îşkenceyan waşt çalakîya rayîrşîyayîşî bikero. Şaro sîvîl raştê guleyan ame û netîceya hêrîşe de 17 kesî merdê û 200 kesan ra zêderî zî birîndar bîyê. Qetlîamî ser ra 29 serrî vîyertê. Faîlê qetlîamî sey her wextî mehkemeyan de ameyê pakkerdiş. Hetê Mehkemaya Heqanê Merdiman a Ewrûpayî ra cezaya tazmînatî ya maddî û manewîyî dîyaye Tirkîya.

Sîyasetmedar û wekîlê DEPî yê ê wextî Mehmut Alinakî derheqê qetlîamê Dîgorî de qisey kerdo.

‘Nêverdayêne kes gonî bido’

Mehmut Alinakî va, “Wexto ke qetlîamê Dîgorî bi ez wekîl bîya. Dîgorijan mi rê telefon kerd û vengê înan de ters û teşwişe estibi. Înan va tîman guleyî varnayê şarî ser û merde û birîdarî estê. Birîndarî kirişîyaybî nêweşxaneyanê Qers û Erziromî. Polîsan derûdorê nêweşxaneyê Qersî girewtibî û nêverdayêne kes gonî bido birîndaran. Şar waşt ma çîyêk bikerê. Mi hema walîyî rê telefon kerd û mi va ganî polîsî verdê ke şar gonî bido birîndaran. Walîyî va ez emnîyetî ra xebere pawena û dima ez do polîsan bianca.”

‘Îşkenceyî ameyê kerdene’

Alinakî va, “Kesê ke gêrîyaybî binê çimî raştê îşkenceyan ameybî. Ma qerar da ke heyetêk bierşawê Qers. Emnîyetî ra kes cewab nêdayêne telefonanê ma. Mi zî walîyî rê telefon kerdêne. Dîyar bi ke înîsîyatîf bi temamî destê tîmanê taybetan de bi. Roja bîne ma şîyê Qers. Walîyî cewabî nêdayêne persanê ma. Eşkera nêvatêne la dîyar bi ke qetlîam bi destê tîmanê taybetan amebi kerdene. Mudirê Emnîyetî zî bibi tewreyê zuran. Cewabanê ey de berz û nizmî estibî. Vatêne, ‘PKKyijan guleyî eşte û eskeran zî cewab dayo’ û qewetanê dewlete pawitêne.”

‘Dîgor de bêvengîya mergî estibî’

Dewamê qiseyanê zo de Alinakî va, “Ma walîtîye ra şîyê neweşxane. Neweşxane bi birîndaran fek ra bi û her kes bi guleyan bibi birîndar. Ma zîyaretîya birîndaran ra dima şîyê Dîgor. Ters niştibi rîyê merdiman. Dîgor de bêvengîya mergî estibî. Ma waşt zêrr bidê şarî û ma cehdeyê pîlî ra peya şîyê qeymeqamtî.”

‘Înan waşt qetlîamî bierzê PKKyî ser’

Mahmut Alinakî va, “Mudirê Emnîyetî ma ra va cayo ke ci ra guleyî ameyê de PKKyijî estibî. La şahidan vatêne derûdorê ê qilî hetê tîmanê taybetan ra amebi girewtiş. Eke raşta zî mîyanê PKKyijan û eskeran de çîyêk bibîyêne ganî merde yan zî birîndarî bibîyêne. Çîyêko winasî nêqewimîyabi û wexto ke ma walîyê Qersî ra pers kerd, nêşka cewabêk bido.”

‘Merdimî erdî ra ameyê kaşkerdiş’

Alinakî dima va, “Ma waşt dima şêrê cayê qetlîamî la polîsêk ma ra va, ‘Hewe bikero ma do bierzê meclîse ser û ma do kelle bigerê’. Dewijan ma ra va, qetlîamî ra dima tîman waşto bi dipçikan înan bikişê. Badê qetlîamî tîman merdeyî bestibî panzeran ra û bi no qeyde ê berdibî bajar. Ma derheqê qetlîamî de raporêk hedre kerd û ma şawit dezgeyan û çapemenîye. Derheqê tîmanê taybetan de dewa ameye akerdene. Dewlete reyna sûcî ser de ameybî tepiştene.”

 ‘Tena kerdoxî vurîyayê’

Mehmut Alinakî peynî de va, “Mehkema guleyan ser de cigêrayîşê balistîkî nêkerd, çimkî pêro çekî yê dewlete bî. Kerdoxê qetlîamî dima Roboskî, Nisêbin, Cizîr û Silopya de eynî çîyî kerdê. No zîhnîyet Qoçgîrî ra, Gelîyê Zîlan ra Dêrsîm ra nat rameno. Çîyo ke vurîyeno tena kerdoxî.”
MA / QERS

parvê bike

Nûçeyên ku dikare bala we bikşîne

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.