Merkezê tecawizî yê Efrînî

• Cinîyî sey ‘emanet’ yenê namekerdiş û nê merkezan de raştê şîdetê cinsî û tecawizî yenê.

Efrîn, 5 serrî verî cû hetê Tirkîya û çeteyanê ci yê paramîlîteran ra ame îşxalkerdiş. Mîyanê nê panc serran de Efrîn bi merkezê şîdet û tecawizan. Goreyê xebera ANHAyî, qeza û dewanê Efrînî de 26 merkezan de 8 hezar 644 kesî yenê tepiştene. Nê merkezan de cinîyî raştê şîdetê cinsî û tecawizî yenê.

Nê merkezan ra tayî nê yê:

• Hepisxaneyê El Mehkemêyî: Awanîya verên a edlîya de yo. Cinîyê ke cayanê cîyayan ra yenê remnayene, tîya de yenê girewtene. Tîya binê kontrolê Cebha El Şamîyê de yo.
• Hepisxaneyê El Mehmudîyeyî: Tîya binê îdareyê grûba El Hemzayî de yo. Xeylê kesê ke ameyê remnayene, tîya de yene girewtene. Cinîyî 2 odayanê taybetan de yenê girewtene.
• Hepisxaneyê Mektebê Îtîhad El Erebîyî: No hepisxane binê kontrolê Cebhe El Şamîyê de yo. Merkezê Efrînî de yo. Seba cinîyan qismêko taybet esto.
• Hepisxaneyê Mektebê El Kerameyî: No mektebanê tewr verênan ê Efrînî ra yo. Binê kontrole Feyleq El şamî de yo. Tîya de zî seba cinîyan qismêko taybet esto.
• Hepisxaneyê Meclîsa Verêne: No hepisxane merkezê Efrînî de yo. Cinîyê ke yenê remnayene, bodrûmê tîyayî de yenê tepiştene. Bitaybetî cinîyê Kurdî hetê îstîxbaratê tirkan û çeteyanê paramîlîteran ra yenê remnayene û erzîyenê nê hepisxaneyî. Tîya de 50 cinîyî yene girewtene. Goreyê malûmatan, hetê îdarekaranê hepisxaneyî ra cinîyî sey ‘emanet’ yenê namekerdiş.

96 cinîyî ameyê qetilkerdiş

Goreyê malûmatanê Rêxistinê Heqanê Merdiman ê Sûrîye-Efrînî, 5 serrî mîyan de Efrîn de 96 cinîyî ameyê qetilkerdiş û 72 cinîyî raştê tecawizî ameyê.

MERKEZÊ XEBERAN