Xoverdayoxê 12ê Êlule: No xoverdayîş do serbikewo

Nûçeyên Rêzexeberê

yekşem 11 îlonê 2022 - 10:42

  • Xoverdayoxanê 12ê Êlule dîyar kerd ke, kerdenê 12ê Êlule ewro zî yenê ramitene la no xoverdayîş rew-erey do serbikewo.

EMRULLAH ACAR / MA / RIHA

12ê Êlule 1980î de darbeyo eskerî virazîya, ser ra 40 serrî vîyertê la kerdenê darbeyi hema zî yenê ramitene. Darbe xo dima enkazêko pîl verda. Bi hezaran kesî gêrîyayê binê çimî, raştê îşkenceyan ameyê û merdê. Riha zî nê binpaykerdişan ra para xo girewtibi. Hereketê Azadîye yê Kurdan Riha de weriştibi payan ser û 12ê Êlule de hezar kesî ra zêder kesî Riha de gêrîyaybî binê çimî û ameybî girewtene. Verfekê Înîsîyatîfê 78îyan ê Rihayî Vahît Akgun û endamê înîsîyatîfî Ahmet Korurî derheqê Hepisxaneyê Dîyarbekirî û 12ê Êlule de qisey kerd. Vahît Akgun û Ahmet Korur darbe de Riha de amebi girewtiş, dima erşawîyaybî Hepisxaneyê Dîyarbekirî û uca de 2 serrî mendibî.

Vahît Akgunî va, “Hereketê ciwanan weriştibi payan ser û vila bîyêne. 12ê Êlule de tewr zêde Riha de hezar kesî ra zêder kesî gêrîyayê binê çimî. Dewaya sereke ya PKKyî estibî la aye ra teber komê Hîlvan, Sêwrege, wêranşar, Pirsûs, Xelfetî-Bozova û Bîrecîkî cîya bî. Her kome de nêzdîyê 200 kesî bîyê. 

‘Riha merkezê îşkenceyî bi’

Akgunî va, “Wexto ke darbeyê 12ê Êlule bi, ma bi hişmedîya ê wextî bi temamî fam nêkerd. Hinî ca nêmendibi ke merdiman dekerê. 30-40 kesî reyêk de kewtêne îşkence û tîya ra zî erşawîyêne Dîyarbekir. 12ê Êlule de Riha merkezê Îşkenceyî bi. Qasê aşman îşkenceyî ameyê ramitene. Ma Riha ra dima Dîyarbekir de 40 rojî binê çimî de mendê. Seba ke herindê îşkenceyan vîndî bê, ma ameyê edilnayîş. Dima ez ameya girewtene û erşawîyaya Hepisxaneyê Hûmara 5ine yê Dîyarbekirî.”

Hereketê Kurdan newe ra werişt payan ser

Dewamê qiseykerdişê xo de Akgunî va, “Ma 35 rojî hucreya yewkesine de 9 kesî mendê. Rojêk de tena qasê çemçikêk werd dîyêne ma. Înan waştêne îradeyê ma bişiknê û ma teslîm bibê. Vera nê kerdenan bi rayberîya Mazlûm Doganî Adara 1981î de xoverdayîşêk dest pêkerd. Mehkemayê dewaya sereke zî dest pêbibî. Waştêne bi îşkence û tehdayan îradeyê şorişgeran bişiknê. 12ê Êlule nêrasa meqsedê xo. Hereketê Kurdan xo ver da. Bi xoverdayîşê xurtî newe ra weriştê payan ser.”

Teslîmîyet ame çinkerdiş

Akgunî va, “Esat Oktayî vatêne, senî ke Koyê Agirîyî de mezele ser o Kurdistano xeyalî tîya de meftun o, ez zî de Hereketê Azadîye yê Kurdan tîya de çin bikerê. Bi çalakîya Mazlûm Dogan û 4an teslîmîyet ame çinkerdiş û adirê xoverdayîşî tehna xo da teber. Kerdenê 12ê Êlule ewro zî yenê ramitene. Tena xoverdayîş eşkeno teslîmîyetî birijno. Ganî her kes xo ver bido.”

12ê Êlule nêrasa meqsedê xo

Ahmet Korurî va, “O wext hetê ciwanan ra Riha de hereket weriştibi payan ser. Riha de faşîstî serdest bî la vera înan xoverdayîşêk estibi. Dima xoverdayîş qezayan ra vila bi. Xoverdayîşê Hîlvan û Sêwrege bîyê bingeyê hereketî. Ameyêne zanayene ke do darbeyêk bibo. Tayînan fam kerdibi. Meseleya Çorûmî ra dîyar bi. Hetê tayînan ra no eşkera ameyêne zanayîş û înan bi goreyê ney kadroyê xo pawitibî. Eke tedbîrî nêameyêne girewtiş, ma ewro nêeşkayêne xoverdayîşêk ra behs bikerê.”

‘Ganî her kes wayîrê nê xoverdayîşî bivejîyo’

Ahmet Korurî peynî de va, “Esat Oktay bi taybetî amebi perwerdekerdiş ke Hereketê Azadîye yê Kurdan çin bikero. Ma o wext nêşkayê vera faşîzmî vengê xo berz bikerê. La hetê Mazlûm Dogan, 4an û xoverdayoxanê 14ê Temûze ra faşîzmê înan nêame qebulkerdiş. Ma minetdarê xoverdayîşê înan ê. Kurdî ewro sereberz ê û ma deyndarê înan ê. Wa kes xo vîrî ra mekero. Ganî her kes wayîrê nê xoverdayîşî bivejîyo. No xoverdayîş do rew-erey serbikewo.”

parvê bike

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.