Rojnameyê Xwebûnî bi kadroya hîraye dest bi weşana xo ya newîye kerde

• Wayîrê îmtîyazî yê rojnameyê Xwebûnî Qedrî Esenî va, “Ma wazenê hedîseyanê Kurdistan û Rojhelatê Mîyanênî bi ziwanê xo birasnê şarê xo.”

Rojnameyê Azadîya Welatî hetê qerernameyêk ame padayene. Padayîşê Azadîya Welatî ra dima, rojnamegerê Kurdî ameyê têhet û hetê nînan ra 21ê Kanûne 2019î de rojnameyê Xwebûnî ame ronayene. Rojname dest bi weşana xo ya dewrê neweyî kerde. Rojnemeyê Xwebûnî hefte de reyêk vejîyeno û heta nika 147 hûmarê ci vejîyayê. Dewrê weşane yê neweyî de hûmara nuştoxan zêdîyayê. Bi nuştoxanê neweyan, hûmara nuştoxan bîye nêzdîyê se kesî.

Tehdayê vera rojnameyî

Qedrî Esenî va, “Azadîya Welat, Rojeva Medya û Welat ameyê padayene û tradîsyonê rpjnamegerîya Kurdkî 21ê Kanûne 2019î ra nat bi Xwebûnî dewam keno. Rojname 3 serrî ra nat Kurdistan de weşanîyeno. Ma rojnameyê xo hesabanê xo yê twitter, instagram û facebookî ser ra zî weşanenê. Heta nika derheqê 10 hûmaranê ma de qerarê topkerdişî ame dayene. Wazenê rojnameyê ma weşana xo bivindarno. Xeylê doliman, xeberanê ma ver hesabê ma yê instagramî ame astengkerdiş. Ma do bi Xwebûnî hedîseyanê Kurdistan û Rojhelatê Mîyanênî bi ziwanê xo hîna xurtêr birasnê şarî.”

‘Nuştoxê ma rasayê nêzdîyê 100yî’

Derheqê dewrê neweyî de Esenî va, “Dewrê neweyî de ma do weşananê xo yê medyaya dîjîtale bizêdînê. Ma do bernameyanê ziwan û tarîxî bivirazê. Ma do meseleyanê aktuelan ser o bernameyan bivirazê. Ma keyepelê xo de vurînayîşî kerdê. 16 nuştoxî beşdarê ma bîyê. Ê do her hefte seba Xwebûnî binusê. Tewrê nuştoxanê mêmanan, nuştoxê ma rasayê nêzdîyê 100yî.”

MA / AMED