Tecrîd û Garê

• Her kes zaneno ke Tirkîya de tena çareserîya persigirikê kurd nê, xetimyayişê sîyasetê Tirkîyaye zî bi akerdişê beranê Îmralîyî çareser beno û wa her kes na raştî her ca de bîyaro ziwan û têkoşînê xo do bidomno. 

LÊL AMED

Serra 1998î de Rayberê Şaran Abdullah Ocalan bi komploya 9’ê Citmenge ya Mîyanênneteweyî, Surîyeye ra ame vetiş, Ocalan zî seba persgirikê kurd, bi aştî çareser bibo ser o xebatkerdişî rê beranê Ewropayî ra resa la nê beran yew bi yew ameyî girewtiş û peynî bi îxanetî, Tirkîya ra ame teslîmkerdiş. 15’ê Sibata 1999î nika Greva Îmlaliyî de binê tecrîdî de hepsîyo. Tecrîdê çi heyfo ke domyeno û vera tecrîdî hepisxaneyan de hewna greva vêşanî dest pê kerd labelê çi heyfo ke bêvengî esto. Tirkîya no bêvengî sey firsetêk dîye û hêrişê  kerd.

Garêyî ra bi teyara û bi seyan leşkerê xo şî la nika leşkerê înan koyê azad de vînî bîyê. Dewlete bi destê xo, lejker û endamê MÎTî ke destê KCKî de bîyê, qetil kerd û nika zî wazenê sey ke PKK nê sûcê merdimayî kerdo nîşan bidê. Heme çapemenî û hesabê înternetî de zî şar zaneno ke PKK, partîyêka sûcê merdimayî nêşuxilneno. Nika vera hêrişê çeteyan, gerîlayan destpê operasyonî kerdê û Hukimata AKP û MHPî pîşmano bîya ke hêrişê Garêyî kerda. Vatişê verênan esto; siwar ameyê la pêya şîyê.

Rayberê Şaran Ocalan bi serranê ke, xebatê xo yê ke ser aştî yê, mîyan nêda û domna. Sîstemê Îmraliyî tena aştîya ciwatî tikey erî keno la nêeşkeno xebatanê Rayberî asteng biko. Sîstemê dewlet û îqtîdarî bîyayişê xo çinkerdişê demokrasi û aştîye ser o înşa kerdî, no ser zî prosesê pêkewtişî zî seba rayberîya xo ya faşîstî ra kerdî semed. Aştî encax bi waştişê ciwatî de bêro. 

Nê çend aşmê ke ma sey zerrîdarê HDPî, Amedî de zîyaretê malbatan kenê. Demê zîyaretî zî malbatan bi kêfweşî beranê xo ma rê akenê û goştarî kenê. Ma înan ra taybetî projeya HDPî ra behs kenê, misal ma wanê: “Felsefeya ronayişê HDPî, kam ê ke xo nêeşkenê rasteyê sîyasetî de îfade bikê, eşkenê xo HDP de îfade bikê, çimkî HDP muxalîfê sîstemî yo û no sîstem de projeye înan ê ke çareserîye estê ra awan bîyo. HDP xo ra partîyêka siwan o. Rojawan de persgirikê yenî cuyayiş, hêrişê dewleta tirk û çeteye ci ra seba persê tifaqa neteweyî şert o. Zîndanan de vera tecrîdê Rayberî de destpêka greva vêşanî destpê kerdo û operasyonê Garêyî domyeno, tewro peynî ma şarê dawetê verê Buroya DBPî ya ke verê Nêweşxaneya Sultanî de ca gêno ra kenê, çimkî roja 15 Sibate de meşêko gird esto.”

HDP hetanî nika çareserîya persgirikê kurd ser o pêşnîyazê xo ard ziwan û bedelê giran zî da. Tefqîfbîyayişê hemserekanê verin Selahattîn Demîrtaş û Fîgen Yuksekdag, Hemsereka DTKî Leyla Guven zî xo ra xebatê çareserîya persgirikê kurd serî yo. Amed de kombîyayişê tifaqa kurdan ser o çend ra kombîyayişê ameyê kerdiş la hema zî nê kombîyayişan netîceyêka bi şenber nêame girewtiş. Ganî partîyê tifaqe zî bizanê ke mesele tena meseleya HDP nîya, meseleya bîyayişê kurdan û çinkerdişê kurdan o. No ser ganî fek hesabê şenik ra veradê û taybetê ê 15ê Sibate lanet bikê û projeye Ocalanî ra wayîr bivejê. Çareserîya persgirekê kurd de tena ameyişê partîyan yew ca, derd û kulê xo bar bikê qiym nêkeno. Ganî tifaq komel de bibo, şaran ganî bêrî têhet. Têkoşînê cenîyan zî do ruhê tifaqe de bîvejo ver. Na seserrî de çareserîya persgirikê kurd de ganî partîyan qerardar bibê.   

Her kes zaneno ke Tirkîya de tena çareserîya persigirikê kurd nê, xetimyayişê sîyasetê Tirkîyaye zî bi akerdişê beranê Îmralîyî çareser beno û wa her kes na raştî her ca de bîyaro ziwan û têkoşînê xo do bidomno. Hukimata AKP û MHP nika bi argumanê netewperestîye wazeno emrê xo derg biko, kam vengê xo vejîyeno, bi lezî botonê terorîstî erzenê, mîsal çalakîyê Bogazîçîyî. Çiqas çalaki û vengvetiş wina lez do îqtîdarê AKP û MHPî têk şîro.