Ûca: Êzizîyî bi rêxistinbîyayîşî xo ver danê

sêşem 2 tebaxê 2022 - 17:12

  • Wekîla HDPyî Feleknas Ûca va, “Êzidîyî vera fermanê 74inî pawitişê xo yê xoserî xurt kenê, vanê ma tîya de yê û wayîrê îradeyê xo vejîyenê.”

Daîşî 3ê Tebaxe 2014î de hêrîşa Şengal kerd û qetlîamêk viraşt. No qetlîam sey Fermanê 74inî ame namekerdiş. Qetlîamê Şengalî ser ra 8 serrî vîyertê. Bi hezaran kesî ameyê qetilkerdiş û domanî zî tede bi hazaran kesî zî esîr gêrîyayê. Badê hêrîşan Êzidîyan Şengalî de îdareyê xo yo xoser rona la Êzidîyî ewro zî raştê hêrîşan yenê.

Wekîla HDPyî ya Êzidî Feleknas Ûca derheqê qetlîamî de û rewşa Êzidîyan ser o qisey kerd.

Feleknas Ûca va, “Cinîyê Êzidîyan bazarî de ameyê rotiş. Hena cayî nêbîyê veng û şar nêame qetilkerdiş, xeylê kesî esîr gêrîyayê. Cinîyî seba ke mekewê deste Daîşî, cuya xo ra bîyê.”

‘Çekê destê Êzidîyan ameybî girewtiş’

Ûca va, “Ma o wext Şirnex Sîlopya de xebatî kerdê. Ma Êzidîyî Mêrdîn, Êlih, Cizîr û Dîyarbekir de ca kerdê. Êzidîyî roja roşanê xo de raştê hêrîşan ameyê. PDKyî verê hêrîşan çekê deste Êzidîyan girewtibî û vatibi ma do şima bipawê. Roja ke Daîşî hêrîşe kerde kam mend, kam rema her kes zano. Êzidîyî qirkerdişî reyde ameyê têrî. Rêxistinê înan çin bî. Hêzê înan ê pawitişî çin bî û verê çimanê dinya de ê raştê qirkerdişî ameyê. Cinîyî ameyê rotiş. Ê roşîyayê Urdun, Misir û Erebîstan. Hema zî 2700 cinîyan ra xeberêk çin a. Paytextê Tirkîya Enqare de zî cinîyê Êzidîyî esîr gêrîyaybî. Keyeyê înan ê Ewrûpayî mecbûrî înan bi pereyan genê. No trajedîyêk o û bi çekuyan îfade nêbeno.”

‘Bêvengî zî berpirsîyar ê’

Derheqê hêrîşanê vera Şengalî Feleknas Ûca va, “Ewro tayê welatê Ewrûpa vanê ma fermanê 74inî sey jenosîdî vînenê û nîya şinasnenê. La nika zî vera Şengalî û şarê Şengalî hêrîşî bene û înan ra vengêk nêvejîyeno. Eke reyna çîyêk bibo, do nê dewletê ke bêveng ê bibê berpirsîyar. Şengalî ser ra planî yenê kerdene. Demêk verî cû artêşê Iraqî bi tanqan waşt bikewo Şengal  la dayîkanê Êzidîyan verê înan girewt. Wazenê hêrîşa Şengalî bikerê.”

‘Êzidîyî wayîrê îradeyê xo vejîyenê’

Feleknas Ûca peynî de va, “Şengal bi merkezê xoverdayîşî. Şengalî de bi fikrê neteweyê demokratîkî cuyêka newîye awane bîye. Qetlîamî ra dima şar bi rêxistinîya xo hêza xo ya xosere awane kerde. Êzidîyan va ma raştê fermanî zî bêrê, ma ewro xo ver danê. Cinîyê ke deste Daîşî ra remayê, ewro pawitişê Şengalî de bîyê rayber. Wazenê sîstemê Şengalî çin bikerê û rêxistinîya înan bikêmnê. La Êzidîyî vanê ma do xo hêzdar bikerê û ma do wayîrê îradeyê xo bivejîyê.”

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.