Veyveyê Pîr Şalyarî hetê Kurdanê Rojhelatî ra ame pîrozkerdiş

• Veyveyê Pîr Şalyarî emser zî Hewraman de rîtuelan ame pîrozkerdiş.

Pîr Şalyar, seserra 11ine de Hewraman de ame dinya û cuya ey tîya de vîyerte. O sey alimêkî Zerduştîye yeno qebulkerdiş. Nameyê ci mehnanê Yarsanan de vîyareno. Veyveyê Pîr Şalyarî, aşma Çeleyî de dest pêkeno û çarşemeyê verênî yê Sibate ra dima hîrêna rojî dewam keno. Pîrozkerdişî her serre Hewraman Textî de vernîya keyeyê Pîr Şalyarî de yenê kerdene.

Goreyê efsaneyî, keynana Qiralê Bûharayî Şah Batûr nêşkena qisey bikera û goşê aye hol nêeşnawenê. Qiral vano kam ke keynaya mi bikero weş, ez do keynaya xo bidî ci. Kes nêşkeno aye weş bikero. Qiral wesfê Pîr Şalyarî eşnaweno. Keynaya xo ano ey het. Demêk ra dima Şah Batûr bena weş. La rewşa Pîr Şalyarî çin a ke xo rê veyve bikero. Şar hetkarî keno û veyveyê Pîr Şalyarî û Şah Batûr yeno viraştiş. Veyveyê Pîr Şalyarî, her serre zimistan û wisar yeno pîrozkerdiş.

Tradîsyonê hezar serran

Domanî keye bi keye gêrenê û şeker û gozan danê arê. Dima şar vernîya keyeyê Pîr Şalyarî de yeno têhet. Qirban yeno kerdene. Dima bi nameyê ‘Aşê Tirş’î werdê veyveyî yeno hedrekerdiş. Werdî ra dima merasîmê zikirî yeno kerdene. Sey helqayêk kewenê têdest û kewenê zikir. Bi zikirî Veyveyê Pîr Şalyarî bi temîlî yeno temamkerdiş.

Roja kulîçeyan

Veyveyê Pîr Şalyarî ra hefteyêk dima Roja Kulîçeyan yena viraştene. Şar keyetan de kulîçeyan virazeno û şino turbeyanê 3 pîranê pîlî yê Hewramanî Pîr Şalyar, Pîr Xalû û Pîr Sîyavînî ser. Tîya de kesêko bi nameyê ‘LaloMemî’ yeno, kulîçeyan arê dano û şarî mîyan de pare keno.

MERKEZÊ XEBERAN