“Wa qetlîamê Şengalî sey qirkerdişî bêro şinasnayîş”

Hetê Komeleya Cinîyan ê Iraqijan û Hereketê Azadîye yê Cinîyanê Êzidîyan ra Bexdatî de konferansêk ame viraştene.

Konferansî de hêverî qetlîamê Êzidîyan ser o qiseykerdişî bîyê û ame waştiş ke qetlîamê Şengalî sey qirkerdişî bêro şinasnayîş. Panelê verênî yê konferansî de rastîya komela Êzidîyan û qetlîamî ser o qiseykerdişî ameyê kerdene.

“Wazenê şarê Şengalî çin bikerê”

Rojnamegere Aysel Averta qiseykerdişê xo de va, “Wexto ke 9ê Temûze de çeteyanê Daîşî hêrîşa Mûsûlî kerd, şarê Şengalî zanayêne ke do hêrîşa înan zî bikerê. Coka înan waşt xo bipawê. 12 hezar pêşmergeyê Barzanîyî soz da ke înan bipawê. La înan şarê Şengalî 3yê Tebaxe de tena verda. Êzidîyî raştê qetlîamî ameyê. Înan waşt şarê Şengalî çin bikerê. YJŞ û Yewîtîya Xoverdayîşî ya Şengalî demêko kilm de ameyê ronayene û înan Şengal pawit. Dima PADÊ Û TAJÊ zî ameyê ronayene û rixistinî xurt bîyê. Hema zî Şengal raştê hêrîşan yeno.”

Wa sey qirkerdişî bêro şinasnayîş

Akademîsyena Zaningehê Bexdatî Madîce Hatû Haşîme va, “Qirkerdiş tena kiştiş nîyo. Ziwanî, kulturî, hunerî çinkerdiş û şîdet û tecawuzî zî qirkerdiş ê. Êzidîyî zaf rey raştê qirkerdişan ameyê. Ganî dinya rewşa Şengalî û cinîyanê Şengalî bivîna û qetlîamê Şengalî ganî sey qirkerdişî bêro şinasnayîş.”

Cinîyan hêza xo mojna

Endama Rêxistina Ciniyan a Azadîya Kurdistanî Lale Azade mesajê Awiqate Barbara Spinel wend. Barbara Spinel mesajê xo de va, “Badê hêrîşanê Daîşî, cinîyî organîze bîyê û înan hêza xo mojna pêro dinya.”
NÛJÎNHA / BEXDAT