24 bajaran de şar seba Jîna Mahsa Amînî werişto payan ser

çarşem 21 îlonê 2022 - 16:32

Goreyê malûmatanê Hengawî çalakîyan de 3 kesî ameyê qetilkerdiş, 221 kesî bîyê birîndar û 250 Kurdî ameyê remnayîş.

Jîna Mahsa Amînî hetê hêzanê rejîmê îranî ra ameybî qetilkerdiş. Grev û çalakîyê ke seba Mahsa Amînî yenê kerdene dewam kenê. Hetê dezgeyê heqanê merdiman ê Hengawî ra malûmatê neweyî ameyê parekerdiş. Goreyê malûmatanê Hengawî, çalakîyan de 3 kesî hetê polîsan ra ameyê qetilkerdiş, 221 kesî birîndar bîyê û 250 Kurdî ameyê remnayîş. Reyna goreyê malûmatan greva ke 19ê Êlule de ameybî dest pêkerdiş 24 bajaran de ameye kerdene û 13 bajaran de protestoyê pîlî bîyê. Bajaranê Kurdan de şar nêvejîyayo teber û zaf cayan de zî çalakîyî ameyê kerdene.

3 kesî ameyê qetilkerdiş

13 bajaran de çalakîyê pîlî bîyê. Bajaranê Rojhelatî yê Dîvandere, Seqiz, Bane, Merîvan, Senendaj, Kamîyaran, Dehgolan, Bijar, Qorveh, Teqab, Mahabad, Serdeşt û Bukanî de şar vejîya kuçeyan û çalakîyê pîlî virazîyayê. Polîsan guleyî varnayê şarî ser û 3 kesî ameyê qetilkerdiş. Guleyanê polîsan ver 221 kesî birîndar bîyê. Dîvandereyî de Mohsen Mohammedî, Dehgolanî de Reza Lotfî û Seqizî de Fereydoun Mahmoudî ameyê qetilkerdiş.

250 ra zêder Kurdî ameyê remnayîş

Goreyê malûmatan, çalakîyan de 250 ra zêder Kurdî hetê polîsan ra ameyê remnayîş. Nasnameyê 30 kesan hetê Henqawî ra ameya tespîtkerdiş. Hengawî dîyar kerdo ke dîmenan û vengan ser o hetê ekîbanê hiqûqî ra cigêrayîşî yenê kerdene û înan dîyar kerdo ke do derheqê netîceyan de malûmatan bidê raya pêroyîye.

MERKEZÊ XEBERAN

 

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.