87 rojnamegerî hepis de kewenê serra neweye

• Rojnamegeran dîyar kerd ke, ganî komel wayîrê rojnamegeranê girewteyan bivejîyo.

Goreyê malûmatanê Komeleya rojnamegeran a Dîcle Firatî, 87 rojnamegerî hepis de kewenê serra neweye. Verba çapemenîye bi ‘qanûnê sansurî’ tedayî zêdîyayê û 2022î de zî Çapemenîya Azade raştê hêrîşan ameye.

Dîyarbekir de 16ê Hezîrane de 16 rojnamegerî ameyê girewtene û hema zî derheqê înan de îddîanameyêk nêameyo hedrekerdiş. 28ê Teşrîna Verêne de zî 11 rojnamegerî gêrîyayê binê çimî û 9ê nînan ameyê girewtene. 

Îdarekarê DFGyî Hakki Boltanî û Verfeka MKGPyî Roza Metîna dîyar kerd ke, ganî komel wayîrê rojnamegeranê girewteyan bivejîyo. 

Polîtîkaya klasîke

Hakki Boltanî va, “Rojnamegerî her roje raştê tedayan yenê. Îqtîdar nêwazeno Çapemenîya Azade karê xo bikera û hêrîşan keno. Erzîyeno keyeyê rojnamegeran ser û bêhiqûq yenê girewtene. Wazenê rojnamegeran bitersnê. Tirkîya de rojnamegeran rê hêrîşkerdiş politikaya klasîk a. Serranê pêyênan de Çapemenîya Azade bi xebatanê xo çapemenîya Tirkîya û dinya ser o zî bandorî kerdê. Waro mîyannetewî de paştî dîyaye Çapemenîya Azade. Hetê xeylê sazîyan ra zîyaretê paştîdayîşî ameyê kerdene. Teberê welatî de zî malûmatê paştîdayîşî ameyê dayene. Seba paştîidayîşî, ganî rojnamegerê teberî sey rojnamegeranê girewteyan xeberan bizirazê û paştî bidê înan.”

161 binpaykerdişî

Roza Metîna zî va, “Tedayî serranê peyênan de zêdîyayê. Nika verê ma de weçînitişêk esto û îqtîdar seba ke serbikewo hêrîşan keno. Eynî wext de vera îradeyê Kurdan û cinîyan hêrîşî yenê kerdene. Rojnamegerê cinîyî raştê şîdetê cinsî û tedayan yenê. Goreyê malûmatanê MKGPyî 27 rojnamegerê cinîyî hepis de yê. 2022yî de 7 aşman de vera rojnamegeran 161 binpaykerdişî qewimîyayê. Îqtîdar wazeno bi nê hêrîşan çapemenîye kontrol bikero.”

Aşman ra nat îddîaneme çin o

Derheqê 16 rojnamegeranê girewteyan de Metîna va, “6 aşmî vîyertê la hema zî derheqê înan de îddîanameyêk nêameyo hedrekerdiş. Ma vera girewtişan kampanyaya ‘xeberêk zî to ra’ daye dest pêkerdiş. Xeylê rojnamegeran paştî daye kampanya. Hetê MKGPyî ra bi dîjîtal kampanyayî yenê ramitene. Rojnamegerî heqê xebergirewtişî paweno û coka nêşkenê bêrê sûcdarkerdiş. Ma vera tedayan reyna heqîqetan rasnenê şarî. Ma do azadîya çapemenîye awan bikerê.”

MA / DÎYARBEKIR