Freedom House Amed de ame zîyaretîya DFGyî

Dîrektoranê Freedom House yê mintiqa şîyê zîyaretîya DFGyî.

Dîrektoranê Freedom House yê mintiqa şîyê zîyeratîya Komeleya Rojnamegeran a Dîcle Firatî. Zîyeretî de Hemserekê DFGyî Serdar Altan, Hemserekê MKGyî Roza Metîna, edîtorê Xwebûn, MA û JINNEWSî ameyê têhet. 

Dîrektorê Freedom House yê Ewrûpa û Asyayî March Behrendtî qisey kerd û dîyar kerd ke sazîya înan dinya de seba ke paştî bida demokrasî û heqanê merdiman xebatan kena.

Altan: Tedaya ke rojnamegeranê Kurdan rê bîyêne nêbedilîyaye

Hemserekê DFGyî Serdar Altanî behsê problemanê rojnamegeranê Kurdan kerd û va, “Rojnamegerê Kurdî 2 serrî yo ke binê tedaya pîle de yê. Rojnamegerî gêrîyayê binê çimî û ameyê girewtene. Rojnamegeranê Kurdan bedelê giranî dayê û ameyê qetilkerdene. 30 serran ra dima nê tedayî hema zî dewam kenê. Înan waşt rojnamegerîye biqedînê. Rojnamegeranê Kurdan timûtim karê xo de israr kerd û tedayî ameyê pûçkerdene. Înan waşt sazîyî meeşkê karê xo bikerê û her sereştişî de dest nîya malzemeyanê înan ê karî ser.”

Edîtorê MAyî Azad Altayî zî qisey kerd û va, “2022yî de Amed û Enqera de nêzdîyê 40 rojnamegerî gêrîyayê binê çimî û 26ê înan ameyê girewtene. 10 rojnamegerî edîtor û muxabîrê MAyî bî. Hema zî 3 edîtorê ma girewteyê. Dest nîyayo ekîbmananê ma ser û wazenê ma meeşkê karê xo bikerê. Ma kêmanîya paştîdayîşan hîs kenê. Nê tedayî erenaya mîyanneteweyî de nînê asayene.”

Awiqat Resûl Temurî zî derheqê binpaykerdişan û destsernayîşê ekîbamanan de malumatî pare kerdê. Reyna raporê ke dewayanê rojnamegeran ra ameyê hedrekerdiş dîyayê heyet.

Dîrektoranê Freedom House dîyar kerd ke ê do hîna zêde paştî bidê rojnamegeranê Kurdan.

MERKEZÊ XEBERAN