Amed de deklarasyonê ‘haştîye’: Ganî kes dîalog û qiseykerdiş ra meterso

Amed de hetê nuştox û hunermendan ra deklarasyonê haştîye ame eşkerakerdene.

Îstanbûl ra dima Amed de zî hetê hunermend û nuştoxan ra deklarasyonê haştîye ame eşkerakerdene. Eşkerayîye, Sûr de awanîya Komeleya Kukturî ya Dîcleyî de ameye kerdene. Xeylê hunermendan îmzaya xo eşta nê deklarasyonî.

Metnê deklarasyonî yo ke hetê Hemserekê PENa Kurde Omer Fîdanî ra ame wendene wina yo:

“Ma vengê haştîye berz bikerê…

Ma nuştox, hunermend û edebîyatkarî yê ke îmza eşta deklarasyonî; vera astengîyanê demokrasîyî îtîrazanê xo raya pêroyîye reyde pare kenê. Eke ma ewro qisey mekerê, beno ke meşte kes memano.

Sere de waştişê demokratîkî yê Kurdan, Elewîyan û xeylê şaran 100 serran mîyan de ameyê binpaykerdene. Komel nika binê manupulasyonê îqtîdarî de yo. Tecrîd destê îqtîdarî de bîyo aparatê îdarekerdişî. Hetê îdeolojîk û polîtîkî ra komel gêrîyayo binê ablûka. Tecrîd û polîtîkayanê şerî ver krîzî giranêr benê.

Ma bawer kenê ke problemî bi muzakereyan yenê çareserkerdene. Proses o ke 2013yî de dest pêkerd û şarî de hêvîya haştîye awan kerde tecrubeyêko erjaye bi. Muxatabê mesele Abdullah Ocalanî reyde pêvînayîşî amebî kerdene. No proses eşkeno newe ra dest pêbikero. Seba haştîya komelkî cesaret lazim o. Ganî kes dîalog û qiseykerdiş ra meterso.

Pêro muxataban rê gazîya ma ya; Ganî hiqûq û heqê merdiman hetê sîyasîyan ra bêrê caardene. Hukmat ganî polîtîkayanê tecrîd, teda û şerî terk bikero. Ma hêvî kenê ke do pêro haştîwazî wayîrê nê fikir û pêşnîyazanê ma bivejîyê.”

MA / AMED