Ganî Abdullah Ocalanî de pêvînayîşî bibê

MA / Mujdat CAN / AMED

Hunermend û nuştoxan ke deklarasyonê ‘Ma vengê haştîye berz bikerê’ îmza kerde dîyar kerd ke ganî Abdullah Ocalanî de pêvînayîşî bêrê kerdene.

Hetê 534 hunermend, roşnvîr û nuştoxan ra Amed û Îstanbûl de deklarasyonê ‘Ma vengê haştîye berz bikerê’ ameyê eşkerakerdene. Ame dîyarkerdiş ke ganî tecrîdê Îmraliyî bêro wedartene û vernîya dîalogî bêra akerdene.

‘Ganî tecrîd cade bêro wedartene’

Hunermend Katîr Çatî dîyar kerd ke Îmrali de îradeyê şarê Kurdî binê tecrîdî de yo û va, “Ganî seba haştîya mayînde gamî bêrê eştene û tecrîd cade bêro wedartene. Hepisxaneyan de çalakîya grevê vêşanîye dewam kena. Ganî hetê berpirsîyaran ra vengê înan bêro eşnawitene û waştişê înan bêrê caardene.”

‘Seba haştîye wa Abdullah Ocalanî de pêvînayîşî bibê’

Şaîr Emîn Aksoyî dîyar kerd ke înan seba haştîya mayînde îmza eşta û va, “Seba haştîye ganî tecrîd bêro wedartene û Birêz Ocalanî de pêvînayîşî bibê. Tena tecrîdê Birêz Ocalanî ney, ganî pêro girewteyan ser ra tecrîd bêro wedartene. Ma wazenê wa hiqûq bêro caardene. Ganî pêro sîyasetmedarî, roşnvîrî û hunermendî vengê xo berz bikerê û wa hinî haştîye biba.”

‘Rayîrê haştîye zî est o’

Hemserekê PENa Kurde Omer Fîdanî dîyar kerd ke ê wazenê bin ê gazîyan vernîya haştîye akerê û va, “Komara Tirkîya ya se serrî wazena estbîyayîşê xo asîmîlasyonê Kurdan ser ra dewam bikera. Ma zî vanê rayîrê haştîye est o. W abi muzakerayan haştîye bêra awankerdene. Na haştîye do seba Tirkîya, Kurdistan û Rojhelatê Mîyanênî zaf muhîm ba.”

‘Wa muxetaban de pêvînayîşî bibê’

Fîdanî dîyar kerd ke şer û haştîye eynî wext de nêbenê û ganî şer bêro vindertene û vengê haştîye bêro berzkerdene. Ey dîyar kerd ke bi mîlyonan Kurd vato ‘Abdullah Ocalan îradeyê min o û wa muzaereyan biramno’. Ey va, “Seba haştîye ganî dewlete şerî bivindarna, muxetaban de pêvînayîşan bikera û prosesê haştîye bida dest pêkerdene.”