‘Azadîya Ocalanî, azadîya Tirkîya ya’

şemî 16 tîrmehê 2022 - 10:34

  • Çetîn Uyar: Meseleya Kurdan bi şerî ney bi pêvînayîşê Ocalanî çareser bena. Azadîya Ocalanî, azadîya Tirkîya ya.

Hemserekê DBPyî yê Wanî Çetîn Uyarî va, “Meseleya Kurdan bi şerî ney bi pêvînayîşê Ocalanî çareser bena. Azadîya Ocalanî, azadîya Tirkîya ya.”

Serekê PKKyî Abbullah Ocalan 23 serran ra nat binê şertanê tecrîdî de Hepisxaneyê Îmraliyî de maneno. 15 aşman ra nat xebere ci ra nêameya girewtiş. Şar keweno na rewşe ver. Tewr peynî 31ê Gulane de cezaya dîsîplînî ya 3 aşmane dîyaya ey. Hemserekê DBP(Partîya Mintiqayanê Demokratîkan)yî yê Wanî Çetîn Uyarî derheqê na rewşe de qisey kerdo.

‘Ma tecrîdî qebul nêkenê’

Hemserekê DBPyî yê Wanî Çetîn Uyarî va, “Ma tecrîdbîyayîşê Birêz Ocalanî qebul nêkenê. 2005î de kampanyaya îmzaye ya ‘Ocalan îdareyê min o sîyasî yo’yî ameye dest pêkerdiş. O wext 6 mîlyon kesî va ‘Ocalan îradeyê min o sîyasî yo’. Ewro na kampanya bêra viraştene, 50 mîlyon kesî beşdar benê. Îqtîdarê AKPyî îradeyê 50 mîlyon Kurdan û yê Rojhelatê Mîyanênî binê tecrîdî de tepişeno. Ma naye qebul nêkenê.”

‘Îqtîdar samîmî nîyo’

Çetîn Uyarî va, “Seba ke tecrîd wedarîyo, 2018î de bi rayberîya Leyla Guven hepisxaneyan de hetê bi hezaran hepsîyan ra çalakîya rojîyê mergî ameybî viraştene. O wext Wezaretîya Edaletî vatibî pêvînayîşê Ocalanî de problem çin o. Dima Ocalanî reyde pêvînayîşêk ame kerdene û çalakîya rojîyê mergî ameye qedînayîş. La çalakîye ke qedîyaye, polîtîkayê tecrîdî reyna kewt kar. Sozê ke o wext ameyê dayene, her kes zano çi yê. Şar dî ke ê samîmî nîyê. Wa îktîdar bizano ke, eke na rewşe nîya dewam bikera ma hedre yê ke reyna bikewê rojîyê mergî.”

‘Tecrîd wedarîyo problemî benê safî’

Hemserekê DBPyî yê Wanî Çetîn Uyarî peynî de va, “Birêz Ocalan, kedkaran rê, karkeran rê, ciniyan rê û pêro komele rê bîyo hêvî. Zaferîyê pereyan şerî rê xerc benê û krîz beno giran. No zî mojneno ma ke, azadîya Ocalanî, azadîya Tirkîya ya. Ma tecrîdî qebul nêkenê û şermezar kenê.”

MA / WAN

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.