CPTyî rê muraceatê Îmraliyî: Cade zîyaret bikerê

şemî 10 îlonê 2022 - 10:51

  • Buroya Hiqûqî ya Seserre saba Abdullah Ocalan, Hamîlî Yildirim, Omer Hayrî Konar û Veysî Aktaşî muraceatê CPTyî kerd.

DÎREN YURTSEVER / MA / ÎSTABÛL

Hepisxaneyê Îmraliyî de polîtîkayê tecrîdî yeno ramitene. Rayberê PKKyî Abdullah Ocalan û 3 girewteyê bînî nêşkenê awiqatan û keyeyanê xo de pêvînayîşan bikerê. Abdullah Ocalanî ra 17 aşmî yo xebere nêameya girewtene. Seba ke pêvînayîşî bibê, hetê Buroya Hiqûqî ya Seserre ra CPT rê muraceat ame kerdene. Muraceatî de derheqê prosesî de malûmatî ameyê dayene.

5 aşmî de 61 muraceatî red bîyê

Muraceatî de ame dîyarkerdiş ke, mabênê 1ê Nîsane û 31ê Tebaxe de hetê awiqatan ra 40, hetê keyeyan ra zî 21 muraceatî ameyê kerdene û nê pêroyî muraceatî hetê Sawcîtîya Bûrsayî û Mudirtîya Hepisxaneyê Îmraliyî ra ameyê redkerdiş.

Muraceatê 775 awiqatan bêcewab mend

Muraceatî de ame vatiş ke, 10ê Hezîrane de seba ke pêvînayîşî bêrê kerdene hetê 775 awiqatan ra Sawcîtîya Bûrsayî rê û Îdareyê Hepisxaneyê Îmraliyî rê muraceat ame kerdene û no muraceat bêcewab mend.

Qedexeyê neweyî

Derheqê cezayanê dîsîplînî û qedexekerdişanê pêvînayîşê awiqatan de zî malûmatî ameyê dayene. Ame vatiş ke, 2ê Teşrîna Verêne ra heta 22ê Nîsane 2022yî pêvînayîşê awiqatan ameybî qedexekerdiş. Dima cade muraceatê pêvînayîşî amebi kerdene la amebi redkerdiş. Badê eşkera bi ke 13ê Nîsane 2022yî de qerarê 6 aşmî qedexeyê pêvînayîşê awiqatan ameyo dayene.

‘Sûc yeno kerdene’

Reyna muraceatî de ame vatiş ke, 3ê Sibate 2022 de cezaya dîsîplînî ameya dayene û hezîrane de qedîyaya. Seba pêvînayîşî muraceat ame kerdene la sawcîtî va cezaya dîsîplînî nêqedîyaya û muraceat ame redkerdiş. Reyna ameyo vatiş ke 31ê Gulane 2022yî de cezaya dîsîplînî ya 3 aşmane ameya dayene. Cezayê dîsîplînî hetê hakimtîye ra yenê nimitene. Ame vatiş ke, muvekkîlê ma heqanê xo ra mehrum manenê û sûc yeno kerdene.

Waştişê cade zîyaretkerdişî

Muraceatî de ca dîya nê waştişan:

“*Ganî komîteya şima cade bêra Îmarali û zîyaretêko DE FACTO biviraza.

*Ganî qedexeyê pêvînayîşan bêrê wedartiş û vernîyê qeraranê bêhiqûqîyîyan bêro girewtiş.

*Ganî muvekkîlî bieşkê keye û wasîyanê xo dê pêvînayîşan bikerê û ganî cezayê dîsîplînî yê bêhiqûqî bêrê wedartiş.

*Ganî verê pêvînayîşan de heqê telefonî zî bêrê caardiş.

*Ganî mektub û faksî meyerê astengkerdiş û astengîyê komînîkasyonî bêrê wedartiş.

*Ganî bêhiqûqîyê ke derheqê kitab, kovar û rojnameyan de yenê ramitene bêrê wedartiş.

*Ganî îşkenceyî, muameleye xirabî û halê imcommunicadoyî bêrê wedartiş û tedbîrî bêrê girewtiş. Yeno waştiş ke, prosedurê ke bi Maddeyê muqaveleyî yê 10/2inî ameyê dîyarkerdiş ganî cade bikewê kar.  

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.