Derhêner Cafer Penahî û 2 derhênerê bînî Îran de ameyê girewtene

• Derhêneran seba ke vera şîdetê Îranî vilawekêk îmza kerda ameyê girewtene. 

Derhêneran seba ke vera şîdetê Îranî vilawekêk îmza kerda ameyê girewtene. 

Îran timûtim vera protestokaran şîdeto giran şuxilnena. Vera nê şîdetê Îranî hetê sînemakaranê Îranî ra vilawekêk ameye îmzakerdiş. Seba ke înan vilaweke îmza kerda, Cafer Penahî zî tede 3 derhênerî ameyê girewtene.

Goreyê malûmatanê ajansê Mehrî yê Îranî, Cafer Penahî seba ke rewşa rewşa derhêneranê tepiştîyan Muhammed Resulof û Mustafa El Ehmedî biperso Tehran de şîyo sawcîtîye. La tîya de Cafer Penahî zî ameyo girewtene.

23yê Gulane de şarê eyalete Huzîstanî vera polîtîkayanê îdareyî vejîyaybî kuçeyan. Polîsan gale kerdibî şarî û hêzêka girane ameybî şuxilnayene. 70 zêder sînemakar vera nê şîdetî bi nameyê ‘Sîlehê xo rone’yî vilawekêk hedre kerdibî û îmza kerdibî.

‘Vera şîdetî vindertiş suc o?’

Îmzakaranê vilaweke ra derhêner Muhammed Resulof û Mustafa El Ehmed 8ê Temûze de bi sucdarîya ‘muxalîxanê şorişî de têkilîye de bîyayîş û şarî fîtkerdiş’î ameyê girewtene. Cafer Penahî medyaya sosyale ser ra va, “Vilaweke de çîyêko teberê qanûnî çin bi. Sînemakaran seba ke vilaweke îmza kerda ameyê girewtene. Verê şîdetî vindertiş suc o.”

Cafer Penahî û Muhammed Resulof Festîvalê Filman ê Berlînî de bi fîlmanê xo xelata Heşê Zernênî girewtibî. Verê cû zî nê derhêneran bi sûcdarîya fîtkerdişê şarî û paştîdayîşê înan ceza girewtibî.

MERKEZÊ XEBERAN