Îranî Hewlêr de sivîlî hedef girewtê

Îranî, bi fuze û SÎHAyan  Konsolxaneyê Amerîka û barageha koalîsyonê mîyanneteweyî rê hêrişî kerdê. Sivîlî zî hedef gêrîyayê û 4 sivîlan cuya xo vîndî kerde.

Îranî, bîşewe Serkonsolxaneyê Amerîka yê Hewlêrî û baregeha koalîsyonê mîyanneteweyî rê bi fuze û SÎHAyan hêrişî kerdê. 

Hêrişan de keyeyê sivîlan zî hedef gêrîyayê. Qezaya Pirzinî de 5 fuzeyî îsabetê keyeyê Pêşrew Dizeyîyî kerdê û 3 kesan cuya xo vîndî kerd û 5 kesî zî birîndar bîyê.

‘Mehneyê şima bêbinge yo’

Konseyê Ewleyîye yê Mintiqaya Kurdistanî eşkerayîye kerde û va, “15ê Çeleyî saete 20.30 de Muhafizanê Şorişî Hewlêr de xeylê cayî bi fuzeyan hedef girewtê. Çi heyf ke goreyê malumatan 4 sivîlî şehîd kewtê. Muhafizê Şorişî vanê ma vera muxalîfanê Îranî nê hêrişî kerdê. No mehne bêbinge yo û ma ney red kenê. Timûtim bi mehneyanê bêbingeyan Hewlêr hedef gêrîyeno. No îxlalkerdişê serdestîya Mintiqaya Kurdistanî û Iraqî yo. Ganî komelo mîyanneteweyî vera nê sûcî bêveng memano.”

MERKEZÊ XEBERAN