Aşma Êlule de Rojhelat û Îranî de tewr kêmî 463 kesî gêrîyayê binê çimî

Îran û Rojhelatî de aşma Êlule de tewr kêmî 463 kesî hetê hêzanê rejîmî ra gêrîyayê binê çimî.

Goreyê malûmatanê Rêxistinê Heqanê Merdiman ê Hengawî, aşma Êlule de Îran de û bajaranê Rojhelatî de tewr kêmî 463 kesî gêrîyayê binê çimî.

Goreyê îstatîstîhanê Hengawî, aşma Êlule de tewr kêmî 203 Kurdî gêrîyayê binê çimî û no zî se ra 44î yê binçimgirewtişan o.

Reyna ameyo dîyarkerdiş ke vera aktîvîstan tedayî zêdîyenê û aşma Êlule de zî 17 aktîv3istî gêrîyayê binê çimî.

Tede cinî û domanî zî estê

Goreyê îstatîstîkan, aşma Êlule de 51 cinîyî gêrîyayê binê çimî. Binê serranê 18î de 50 domanî aşma Êlule de gêrîyayê binê çimî yan zî ameyê vîndîkerdene. Domanî, Belucistan, Rojhelat, Tehran û Meşhedî de gêrîyayê binê çimî. Reyna goreyê malûmatan, aşma Êlule de 4 rojnamegerî, 4 wendekarî û 14 hunermend û aktorî gêrîyayê binê çimî.

MERKEZÊ XEBERAN