Îranî aşmêke de 45 kolberî qetil kerdê

Tora Heqanê Merdiman a Kurdistanî dîyar kerd ke aşmêke de 45 kolberî ameyê qetilkerdiş û 34 girewteyê Kurdî ameyê dardekerdiş.

Tora Heqanê Merdiman a Kurdistanî, bi raporêk eşkera kerd ke mabênê 21ê Kanûne 2023yî û 21ê Çeleyê 2024î de 45 kolberî hetê rejîmê Îranî ra ameyê qetilkerdiş û kolberêk zî hîşarêk ra kewto û bigiran birîndar bîyo.

9 kolberî raştê îşkenceyan ameyê

Goreyê malumatanê raporî, tewr zêde sînorê Banê û Newsûdî de kolberî raştê hêrişan ameyê. Ameyo dîyarkerdiş ke sînorê Biyareyî de 4ê înan domanî 9 kolberî raştê îşkenceyanê hêzanê rejîmî ameyê, porê înan ameyo rutkerdiş û ê veradîyayê.

34 Kurdî ameyê dardekerdiş

Roporî de bale ancîyaye cezayanê dardekerdişî ser o û ameyo dîyarkerdiş ke 34 Kurdî ameyê dardekerdiş. Ameyo dîyarkerdiş ke derheqê 11  kesan de talukeyê dardekerdişî est o. goreyê malumatanê raporî, 45 aktîvîstî ameyê girewtene û cinîya bi nameyê Ruiya Heşmetî seba ke sere xo girewto 74 kirbacî ceza dîyaya aye. Reyna ameyo dîyarkerdiş ke Îlam û Kirmaşan de 2 cinîyê hetê lajanê x ora ameyê qetilkerdiş.

YENÎ YAŞAM