Egîtîm-Senî ra gazîya perwerdeyê ziwanê dayîke

Nûçeyên Komel û Cuye

pêncşem 12 Çileyê 2023 - 14:52

Hetê Şûbeyanê Egîtîm-Senî yê Amedî ra derheqê perwerdeyê ziwanê dayîke û dersanê weçînitîyan de malûmatêk ame dayene.

Şûbeyanê Egîtîm-Senî yê Amedî, derheqê perwerdeyê ziwanê dayîke û dersanê weçînitîyan de awanîya Şûbeya 1î ya sendîqa de kombîyayîş viraşt. Metnê kombîyayîşî bi Kurdkî û Tirkî ame wendene.

Hemsereka Şûbaya 1î ya Egîtîm-Senî ya Amedî Emîne Akşahîne va, “Ziwanî rayîr mojnenê komelan û komelî rayîr mojnenê ziwanan. Bi no qeyde ziwan beno nasnameyê komelî. Seba ke komelêk aver de şêro, ganî domanî bieşkê bi ziwanê xo perwerde bivînê û kulturê xo bişinasnê. Mela bi no qeyde komelî eşkenê aver de şorê. Coka muqtedîrê ke mewazê komelêk aver de şoro, hêverî verê ziwan û kulturê nê komelan genê. Nê welatan de bê ziwanê resmî, ê ziwanê bînî yenê qedexekerdiş yan zî pasîfîze benê”

‘Ganî perwerdeyê ziwanê dayîke bibo’

Akşahîne va, “Ganî perwerdeyê ziwanê dayîke bêro dayene û goreyê metodanê zanistîyan bêro dayene. Sewbîna polîtîkayî bê xapînayîş çîyêk nîyê. Domanê ke ziwanê înan Kurdkî, Erebkî, Ermenîkî, Lazkî, Hemşînkî, Çeçenkî, Sûryankî yo û şarê bînî ziwanê x ora dûrî manenê. Na rewşe sere de domanan ser o bandor kena. Hetê pedagoji û formasyonî ra zî dîyar o ke perwerdeyê ziwanê dayîke seba domanan zaf muhîm o. No qederêk nîyo û ganî bêro vurînayîş. Ma sey Egîtîm-Senî vanê ganî pêro şarî bieşkê bi ziwanê xo perwerde bigerê. Bê na game do qet yew çîyêk ziwanî rê mebo çareyêk. Reyna derheqê dersanê weçînitîyan de zî prosesêk yeno ramitene û ma wazenê nînan zî pare bikerê.”

‘Ma do vera bêhiqûqîye de vinderê’

Akşahîne peynî de va, “Dersanê weçîniteyan de goreyê mevzûatan nîno têgêrayîş. Serranê verînan de, hetê îdarekaran ra formî ameyê dekerdiş, bêdestûrê welîyan dersî ameyê weçînayîş û xeylê çîyê bêhiqûqî ameyê kerdene. Eke reyna nê çîyî biqewimîyê, ma wazenê wa endamê ma û welîyî muracatê sendîqaya ma bikerê. Ma do prosese weçînitişê dersan nêzdî ra teqîb bikerê. Ma do vera pêro bêhiqûqîyan de vinderê. Wa bêro zanayene ke, deerheqê polîtîkayanê perwerdeyî de ma do sey her wextî vera rayîrmojnayîşanê sîyasî û îdeolojîkan de vinderê.”

MA / DÎYARBEKIR

parvê bike

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.