Seba averberdişê perwerdeyî akademîya newîye ameye akerdene

Qamişlo de seba averberdişê perwerdeyî akademîyêka newîye ameye akerdene.

Desteyê Perwerde û Musnaayîşî yê Bakûr û Rojhelatê Sûrîyeyî bi aramancê averberdişê îdarekaranê perwerdeyî Qamişlo de akademîyêka newîye akerde.

Akademî de 2 komîteyî estê

Akademîya Perwerde û Cigêrayîşanê Stratejîkî de Komîteya Cigêrayîşan û Komîteya Açarnayîşî estê. Komîteya Cîgêrayîşan do modernkerdişê sîstemê perwerdeyî û rewşa wendekaran ser o xebatan bikera. Reyna, komite do sîstemanê perwerdeyî yê dinya ser o zî cigêrayîşan û xebatan bikera. Komîteya Açarnayîşî de zî pisporê kurdkî, erebkî û suryankî ca gênê. Hetê nê pisporan ra do rapor û belgeyi bêrê açarnayîş.

Endama akademiye Henan Inize dîyar kerd ke her komeke mamosteyan do 3 aşmî perwerdeyê îdarekarîye bigerê û va, “Endamê ke do bibê beşdarê perwerdeyî do cigêrayîşanê xo hedre bikerê. Nê cigêrayîşê înan do bibê leteyê erjnayîşê asta înan.”

5ê Êlule de koma yewîne ya mamosteyan dest bi perwerdeyî kerd. Na kome de 18 mamosteyî estê û mamosteyî Şehba, Qamişlo, Reqa, Kobanî û Minbic ra beşdarê perwerdeyî bîyê.

XWEBÛN