Fehîm Işik: Kurdî Rojhelatê Mîyanênî de wayîrê hêzêka tewre pîle yê

yekşem 24 tîrmehê 2022 - 16:54

  • Fehîm Işik: Eke NATO û hêzê Rojawanî paştî medayêne Tirkîya, ewro Tirkîya nêşkayêne vera Kurdan polîtîkayê qirkerdişî biramna.

MEDYA HENAN / HENAN

Rojnameger Fehîm Işikî va, “Eke NATO û hêzê Rojawanî paştî medayêne Tirkîya, ewro Tirkîya nêşkayêne vera Kurdan polîtîkayê qirkerdişî biramna.”

24ê Temûze 1923yî de mabênê dewletanê sewkewtîyan ê şerê cihanê 1inî û Hukmatê Tirkan de Muqaveleyê Lozanî ame îmzakerdiş. Bi goreyê nê muqaveleyî sînorê Tirkîya ameyê dîyarkerdiş û Kurdistan bi çar lete. Rojnameger Fehîm Işikî derheqê meseleye de qisey kerdo.

250 hezar Kurdî ameyê qetilkerdiş

Rojnameger Fehîm Işikî va, “Tirkîya badê Lozanî vera Kurdan dest bi qirkerdiş û asîmîlasyonan kerd. Kurdan zî vera nê polîtîkayan xo ver da. 1925î de Kurdî bi rayberîya Şêx Seîdî weriştî pay. Dima Agirî û Dêrsimî de zî Kurdan xo ver da û dima zî Kurdan timûtim xo ver da. Dêrsimî de qirkerdişêko pîl ame viraştiş. Bi goreyê belgeyanê resmîyan 250 hezar Kurdî ameyê qetilkerdiş. Heta 1960î bêvengîyêk estibî la tîya ra pey Kurdan ra reyna vengî bîyê berz.”

Awanbîyayîşê PKKyî ê bînan ra cîya bi

Fehîm Işikî derheqê awanbîyayîşê PKKyî de va, “PKK 1984î de vera Tirkîya dest bi xoverdayîşê biçeke kerd. No ser xoverdayîşanê bînan nêbi. Demêkî kilmî de vila bi. Bi xoverdayîşê PKKyî Tirkîya rincane bîye. Tirkîya waşte bi teknolojîyê eskerî PKKyî biqedîna la sernêkewte. Tirkîya Muqaleleyê Lozanî ra dima hêzanê rojawanî de têkilîye de bî. Rojawan Tirkîya sey dêsî diyene û înan 1950î de Tirkîya kerde endama NATOyî. Tirkîya NATOyî ra paştî gena û vera Kurdan polîtîkayê qirkerdişî ramena. Badê şorişê 19ê Temûze Tirkîya vera Rojavayî hêrîşê xo zêdînayê. Xeylê cayî hetê Tirkîya ra ameyê îşxalkerdiş. Rojavayî şaran wayîrê felsefeye Birêz Abdullah Ocalanî vejîyayê û îdareyêko demokratîk û xoser ame awankerdiş. NATO, Amerîka û Rusya vera Tirkîya bêveng mendê û kewtê menfeatanê xo dima. No paştîdayîş Madrîd û Tehranî de eşkera bi.”

‘Kurdî Rojhelatê Mîyanênî de wayîrê hêzêka tewre pîle yê’

Rojnameger Fehîm Işikî peynî de va, “NATO seba endamtîya Swêd û Fînlandîyayî paştî da polîtîkayanê Tirkîya. Kurdî ewro Kurdê 1923yî nîyê. Ganî dinya fam bikera. Kurdî Rojhelatê Mîyanênî de wayîrê hêzêka tewre pîle yê. Artêşê Tirkîya mîyanê dewletanê NATOyî de 2yin o la Kurdî vera hêrîşanê nê arteşî xo ver danê. Kurdî hetê sîyasetî ra zî hêzdar ê. Tirkîya do sermekewa. Beno ke giran bo la Kurdî do bi Ermenî, Sûryanî, Ereban reyde xo ver bidê û binmekewê.”

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.