HDP: Berpirsîyarê mergê hepsîyan wezîrê edeletî yo

yekşem 28 tebaxê 2022 - 09:26

  • Hetkarê Hemserekê Pêroyî yê HDPyî Serhat Erenî va, “Mergê hepsîyan ra wezîrê edeletî berpirsîyar o. Seba ke binpaykerdişî biqedîyê ganî Wezaretîya Edeletî wezîfeyê xo biyara ca.”

Komîsyonê Heqanê Merdiman û Hiqûqî yê HDPyî derheqê binpaykerdiş, tecrîd û mergê hepsîyan de kombîyayîşêk viraşt. Kombîyayîşî de rewşa hepisxaneyan hetê Hetkarê Hemserekê Pêroyî yê HDPyî Serhat Erenî ra erjnayîşî ameyê kerdene. Erenî va, “Hepisxaneyan ra cinazeyî vejîyenê, heqî binpay benê û tecrîd zî giran beno. Birêz Ocalanî de pêvînayîşî nêbenê û pêro heqê ci binpay benê. Vanê îşkence çin o. Çîyo ke Îmrali de beno îşkenceyo tewr pîl o. Goreyê raporanê CPTyî no ameyo eşkerakerdiş.”

‘Hiqûq hêverî Îmrali de binpay bi’

Erenî va, “Qanûnê hiqûqî hêverî Îmrali de ameyê binpaykerdiş. Na bêhiqûqîye pêro hepisxaneyan ra vila bîya. Hepsîyî tedawî nêbenê û heqê înan binpay benê. Her hefte hepisxaneyan ra cinazeyî vejîyenê. Ma zanê ke nê mergî normal nîyê.”

‘Wezîrê Edeletî pêro mergan ra berpirsîyar o’

Dewamê qiseykerdişê xo de Erenî va, “Seba ke hepisxaneyan de hepsîyî bitemamî tedawî nêbenê û şertê hepsxaneyan xirab ê, hepsîyê nêweşî mirenê. Nêweşê ke hinî nêşkenê îhtîyacîyanê xo ca biyarê, bi raporanê tibê edlîyî hepis de manenê. Wezîrê Edeletî berpirsîyarê nê mergan o. Seba ke nê binpaykerdişî biqedîyê ma do xebatanê xo biramnê. Ganî nê binpaykerdişî bêrê wedartiş.”

‘Merdimî binê tecrîdî de yê’

Vervekê Komîsyonê Hepisxaneyan ê HDP Alîşan Şahînî va, “Tecrîd pêro hepisxaneyan ra vila bîyo. Hinî hepsîyî hucreyan de manenê. Bi hepisxaneyanê ewlehîyanê berzinan pêro hepsîyî kewtî binê tecrîdî. 2021 de ekseriya înan sîyasîyî 51 hepsîyî zere de merdê. Ganî nê pêroyî bêrê vînayîş. Nê pêroyî sûc ê. Ma do teqîbkarê hepisxaneyan bê û ma do xoverdayîşê xo yê hiqûqî û sîyasîyî biramnê.”

Tehlîyeyê şertinî yenê astengkerdiş

Şahînî va, “Wextanê peyênan de ma vînenê ke tehlîyeyê şertinî yê PKKyijan yenê astengkerdiş. Bi raporan tehlîyebîyayîşê înan yeno astengkerdiş. 6 aşman ra nat no polîtîka bi zanayîş yeno ramitene. Eke şima PKKyij yan zî çepgir bê, munkin nîyo ke şima bi tehlîyeyê şertinî hepis ra vejîyê. No esîrgirewtiş o.”

Vera hepsîyanê sîyasîyan cîyakarîye bena

Peynîyê qîseykerdişê xo de Şahînî va, “Ma keyeyanê hepsîyan ra eşnawenê û xebatanê xo de zî vînenê ke, hepsîyê sîyasîyî raştê cîyakarîye yenê. Înan ra yew heqê telofonî yo. Hepsîyê edlîyî eşkenê hefte de qasê 30 deqîqeyan telefon de qisey bikerê la no heq hepsîyanê sîyasîyan rê 10 deqîqe yo. Nika vanê no tena seba îdarekaranê rêxistinî rê wina yo la ma zanê ke kesê ke nê heqî ra mehrûmê na ceza nêgirewta. Hinî nêşkenê cîyakarî û nîjadperestîya xo rê pîne zî peyda bikerê. Ganî nê bêhiqûqîyî bêrê wedarti.”

MA / ENQERA

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.