‘Hesabê şima do Kurdistan ra têpîya agêrê’

Parlamentera Colamêrgî Oznur Bartine vera ‘Cîlo Fest’î razînêbîyayîşê xo ramojna û va hesabê şima yê çinkerdişî do Kurdistan ra têpîya agêrê.

Parlamentera Partîya Çep a Keske ya Colemêrgî Oznur Bartine vera ‘Cîlo Fest’ o ke hetê qeyûmê Gever û Walîtîye ame viraştene meclîs de razînêbîyayîşê xo ramojna. Bartine dîyar kerd ke bi nê festîvalî vera kultur, ziwan û nasnameyê Kurdan hêrîşêk ameya kerdene.

Tayînan rê warê şovî ame akerdene

Bartine va, “Vera kultur, ziwan û nasnameyê Kurdan polîtîkayê asîmîlasyonî yenê ramitene. Bin ê festîvalî no reyna bi eşkera. Tayînan rê warê şovî ameyo akerdene û têkilîya înan û Colemêrgî pîya çin a. Wazenê kulturê Kurdanê qedîmî çin bikerê.”

Reyna ameyo qedexekerdene

Peynîya qiseykerdişê xo de Bartine va, “Kurdî vera nê dek û dolaban serran ra nat xo ver danê. Hesabê şima yê çinkerdiş û xeripnayîşî do reyna Colemêrg û Kurdistan ra têpîya agêrê. Goreyê hesabanê îqtîdarî 3 rojan ra dima reyna mintiqa ameya qedexekerdene. Wa baş bêro zanayene ke ma do vera nê zîhnîyetê şima şaran reyde festîvalanê zafziwan û zafkulturîyan virazê û ma do zîhnîyetê şima yê puyayeyî binbifînê.”

MA / ENQERA