Partîya Çep a Keske: Ferqê nê hêrişan û zîhnîyetê DAÎŞî çin o

Partîya Çep a Keske dîyar kerd ke ferqê hêrişanê Tirkîya û zîhnîyetê DAÎŞî çin o.

5ê Teşrîna Verêne de hetê Tirkîya ra Bakur û Rojhelatê Sûrîyeyî rê hêrişî dest pêkerdê. Derheqê hêrişan ê Tirkîya de hetê Partîya Çep a Keske ra eşkerayîye ameye dayene. 

‘Hêrişanê DAÎŞî ra ferqê xo çin o’

Eşkerayîye de nê çîyî ameyê vatene: “Roja 5ê Teşrîna Verêne, Bakur û Rojhelatê Sûrîyeyî de awanîyanê sivîlan rê bi talîmatê AKPyî bi desan hêrişê hewayî ameyê kerdene. Hêrişan de santrale ceyranî, fabrikaya tuxlayan, depoyê xeleyî, awbendî, pirdî, rayîrî û xeylê cayî ameyê bombakerdiş. Hêrişan de sivîlî zî tede xeylê welatîyê Bakur û Rojhelatê Sûrîyeyî merdê û birîndar bîyê. Cuya Kurd, Ereb, Suryanî, Turkmen û Ermenîyan raştaraşt hedef gêrîyaya û ferqê nê hêrişan û hêrişanê DAÎŞî çin o.

Îtîrafê sûcê şerî

Hêrişan ra çend rojî verî cû Wezîrê Karanê Teberî yê AKPyî Hakan Fîdanî dîyar kerdibi ke ê do cayanê sivîlan ê Kurdan hedef bigerê. Eşkerayîya Fîdanî beyan kerdo ke îqtîdarê AKPyî do vera Bakur û Rojhelatê Sûrîyeyî sûcanê sîstematîkan bikerê. Raya pêroyîye rê ameyo parkerdene ke do sivîlî hedef bigêrîyê û no hiqîqo mîyanneteweyî de yeno manaya sûcê şerî. No beyanat bi eşkera îtîrafê sûcê şerî yo.

Herinda ke bi rayanê haştîye meseleya Kurdan çareser bikera, Tirkîya ça de Kurdî estê hêrişan kena. Sey Partîya Çep a Keske ma do vera nê rejîmî û zîhnîyetî pozîsyonê xo yê haştîye û dîalogî bipawê. Ma do timûtim vera şerî de vinderê.

Muxalefet paştî dano AKPyî

Berpirsîyarê nê hêrişan îqtîdarê AKP-MHPyî yo û no proses de berpirsîyarîya pêro muxalefetî zî esta. Îqtîdarî AKPyî do nêzdî ra tezkereye Iraq û Sûrîyeyî biyaro meclîs. Ma veng a muxalefetî danê: AKP vera Kurdan şerêk keno û eke şima paştî bidê tezkereyê nê şerî, şima do bibê şerîkê nê sûcê şerî. Talîmatê hêrişan hetê AKPyî ra maeyo dayene û ganî bêro zanayîş ke muxalefet zî paştî dano ci.”

MA / ENQERA