Sakî: Pêro komel binê tecrîdî de yo

Parlamentera Partîya Têduştîye û Demokrasî ya Şaran (HEDEP) a Stenbolî Ozgul Sakî derheqê Komployê 9ê Teşrîna Verêne ya 1998î de ANFyî rê qisey kerd.

Parlamentera Partîya Têdûştîye û Demokrasî ya Şaran (HEDEP) a Stenbolî Ozgul Sakî ard ziwan ke tecrîd Îmrali û pêro komelî ra vila bîyo û wina qisey kerd: “Îqtîdarê AKP-MHPyî keno ke bi tecrîdî welatî îdare bikero û pêro dezgehanê dewlete de tecrîd cabikero.”

Ozgul Sakî dîyar kerd ke tecrîd noqtaya îqtîdarî ya tewr hesas a û vat: “Tecrîdî Îmrali de dest pêkerd û pêro komelî ra vila bî. Îqtîdarê AKP-MHPyî keno ke bi tecrîdî welatî îdare bikero û pêro dezgehanê dewlete de tecrîd cabikero. Meseleya tecrîdî noqtaya îqtîdarî ya tewr hesas a. Wexto ke qala tecrîdî yena kerdene, îqtîdar cade pê mehkemeyan teda keno. Ma ney nimûneya Merdan Yanardagî de dî.

Tecrîd qasê 24 serrî yo dewam keno. La ne têkoşînê kurdan o polîtîk ne têkoşînê cinîyan ne zî têkoşînê şarê kurdî qedîyayo. Ganî bi têkoşînê yewbîyayeyî ma prosesî îdare bikerê. Kolombîya de gerîlayê FARCî yo verên bî serekê dewlete. Ganî ma nê nimûneyan ra tecrûbe bigêrê. Mîsal Kolombîya de ‘Cinîyê Seba Haştîye’ est bîyê. Ganî ma zî welatê xo de derheqê îmkan û metodanê têkoşînê kolektîfî de nîqaşan bikerê.”

Sakî vist vîrî ke 2015 ra dima îqtîdarî prosesê çareserîye qedîna, têkilîya şorişgêran a bi têkoşînê azadîye yê kurdan kêmînaya û vera kurdan şer dayo destpêkerdene. Sakî wina vat: “Ma neçare yê ke na têkilîye newe ra awan bikerê. Na têkilîye ganî teyna têkilîya weçînayîşî nêba. Cinîyî zî mîyanê komelî de yenê tecrîdkerdene. Îqtîdarê AKP-MHPyî kamî meqbûl nêvîno tecrîd keno. Ma ney çalakîya Mayanê Şemeyî de zî vînenê. No zî tecrîd o. Îqtîdar keno ke vengê înan bibirno, têkilîye biqedîno. Vera nê kerdişan ma rê têkoşînêko kolektîf lazim o.”

XWEBÛN