Kongre ramojna ke gamêke têpîya nêameya eştene

Sereka Partîya Şorişgere Elîf Torun Onerene kongreya HEDEPî erjna û dîyar kerd ke kongre ramojna ke şaran gamêke têpîya nêeşta.

Partîya Çep a Keske, vîzêrî kongreya xo ya 4ine bi beşdarîya hezaran kesan Enqera de viraşte. Nameyê partî ame vurînayîş û partî do xebatanê xo bi nameyê Partîya Têduştî û Demokrasîyî ya Şaran (HEDEP) biramna. Hemserekîya partîye rê Tulay Hatîmogullari û Turcer Bakirhan ameyê weçînayene. Sereka Pêroyî ya Partîya Şorişgere Elîf Torun Onerene zî beşdarê kongre bîye û aye atmosfere kongre erjna.

Tecrîdê Îmraliyî

Onerene dîyar kerd ke şarî bi kelecanîye kongre teqîb kerd û va, “No eleqe ramojneno ke sere de şarê Kurdî, sosyalîstan û welatperweran gamêke têpîya nêeşta û wayîrê partî vejîyenê. Vera bloqê faşîstî yê AKP-MHPyî ma tîya de yê. Tecrîdêk Îmraliyî ra dest pêkerdo û pêro hetan ra vila bîyo. Tek rayîrê şikitişê tecrîdî xoverdayîş o. Eke tecrîd bêro şikitene, ma hêvî kenê ke do rayîrî bêrê akerdene û haştîye bêra awankerdene. Ganî sere de tecrîdê Îmraliyî û yê pêro hepisxaneyan bêro wedartene. Ma do tecrîdî bi xoverdayîşê şorişgerane yê pêro pîyayî bişiknê. Ma do na xete kuçeyan de awane bikerê.”

‘Îqtîdar nêşkeno Rojava de serbikewo’

Onerene dîyar kerd ke kongre de hêrişê ke Bakur û Rojhelatê Sûrîyeyî rê benê ameyê protestokerdene û va, “Şorişê Rojavayî Îqtîdarî rê bîyo derd û wazeno bi hêrişanê xo destkewteyanê ucayî çin bikero. Deskewteyê Rojavayî pêro dinya rê bîyê nimûne û wazenê nê destkewteyan çin bikerê. Wazenê xoverdayîşê Rojavayî çin bikerê la îmkanê xo çin o ke serbikewê.”

MA / ENQERA