Înan va ‘Nê Kurd ê, bikişê’

• Tarafdarê Amedsporî T.K.yî va, “Înan çend kesan va ‘Nê Kurd ê, terorîst ê, bikişê’ û ma raştê hêrîşe ameya.”

ESRA SOLÎN DAL / MA

Maçê Bûrsaspor û Amedsporî de kaybezê Amedsporî raştê hêrîşanê faşîzanan ameyê. Fotografê endamanê JÎTEMî û yê Torosanê Sipîyan ameyê berzkerdiş. Taraftarê Amedprorî yê ke hetê Bûrsasporî de maç temaşe kerdêne raştê lînkerdişî ameyê.

Tarafdaranê Amedsporî ra T.K.yî derheqê hêrîşan û lînckerdişî de Ajansê Mezopotamyayî rê qisey kerd.

Bilêtî verî ra ameyê girewtiş

T.K.yî dîyar kerd ke, 3 serrî verî cû dezaya xo reyde Wanî ra îdareyî ver ameyo Bûrsa û va, “Ma verî ra bilete xo girewtibî. Ma ke stadî ra bîyê nêzdî, derûdorî de tarafdarê Amedsporî çin bî û ma rewşe ferq kerd. Ma seba ke maçî temaşe bikerê, ma hetê taraftaranê Bûrsasporî ra kewtê zere. Min û dezaya xo ma va qasê 15 deqayan ma temaşe bikerê bikerê çîyêk nêbeno.”

‘Ma ke Kurdkî qisey kerd înan hêrîşe kerde’

T.K.yî va, “Meqsedê ma tena temaşekerdişê maçî bi. Derheqê pozîsyonan de ma mabênê xo de Kurdkî qisey kerd. Vengê ma şîyo grûbêke înan. Înan goş nayo ma ser. Hêverî înan bi milpêşanê xo dayê ma ro. Ma fam kerd û ma va uca ra dûrî bikewê. Mabênê înan ra çend kesan va ‘Nê Kurd ê, terorîst ê bikişê’. Senî ke nîya va, 60-70 kesan hêrîşa mi kerde. Ez ver bi berê teberî vazdaya û uca de zî 400 kesan hêrîşa ma kerde. Înan nengê pîsî çînayê.”

‘Eke ma meşkayêne biremê…’

T.K.yî dîyar kerd ke, qasê înan kaybazan rê zî hêrîşî ameyê kerdene û va, “Sloganê nîjadperestî ameyêne eştene û nengî ameyêne çînitene. Beyraqa Amedsporî ameye vêşnayene. Ma raştê lînkerdişê pîlî ameyê. Înan waşt ma corî ra berzê war. Ma xo zor xelisna. Seba ke ewleyîya maç in bî ma uca ra remayê. Mi waştêne ez gerre bikerê la ez tîya de xerîbîye de ya û derdê îdareyî de ya.”

‘Kurdîtîye hedef gêrîyaye’

T.K.yî peynî de va, “Kesê ke nê hêrîşî kerdê însan nîyê, nê wehşî yê, nê cinawir ê. Hinî vate çin o ke ez înan ra vajî. Amedspor mehneyê înan bi. Kurdîtîye hedef gêrîyaye. Bifikirê ez şîya ke maçî temaşe bikerê, mi ser de çîyêkî Amedsporî çin o, sey welatîyêk ez şîya ke maçî temaşe bikerê. Kurdkî qiseykerdişê ma înan rê bi problem. Çend çekuyê Kurdkî weşê înan nêşîyê. Ez nêwazena kesêk raştê hêrîşanê winasîyan bêro. Na cîyatîye rê hinî bes o.”