Şaristanê Kolnî yê Almanya de 17ê sibate de seba azadîya Serekê PKKyî Abdullah Ocalanî rayraşîyayîş do bêro serûberkerdene.
KCDK-E venga kulî welatperestan dano ke 17ê sibate de tewrê rayraşîyayîşê Kolnî bibê.
Kongreya Komelê Demokratîkî ya Kurdîstanijan a Ewropa (KCDK-E) bi eşkerayîyêke da zanayene ke 17ê sibata 2024î de şaristanê Kolnî yê Almanya de seba azadîya Serekê PKKyî Abdullah Ocalanî rayraşîyayîşo merkezî do bêro kerdene.
Eşkerayîye de ame parekerdene ke rayraşîyayîş bi wesîleya serrgêra 25. ya Komployê Mîyanneteweyî, bi şîarê ‘Rayber Apoyî rê Azadîye’ do bêro kerdene.
KCDK-E eşkerayîye de vist vîrî ke 25 serrî yo Abdullah Ocalan binê şert û mercanê tecrîdî de Îmrali de tepişîyeno û yeno armanckerdene ke têkilîya ey a bi şarî wa bêra birnayene. KCDK-E bale ante ser ke 36 mengî yo Rayberê Şarê Kurdî ra xeberêke zî nêna girewtene û dezgehê Ewropa yê sey CPTyî zî bi bêvengîya xo benê hemkarê tecrîdî.
KCDK-E vat: “Rayber Apo temsîlkar û lîderê têkoşînê azadîye yê kurdan o. Ewro paradîgmaya ey a azadîye pêro dinya rê vila bena. Seba çareserîya meseleya kurdan, demokratîkbîyayîşê Tirkîya û qedîyayîşê şerî azadîya Rayber Apoyî şert a. Ma venga CPT, Konseya Ewropa û Neteweyanê Yewbîyayeyan danê ke cade sîstemê îşkenceyî yê Îmraliyî biqedînê, heyetêkî bişawê Îmraliyî.
Bi wesîleya serrgêra Komployê 15ê Sibate rayraşîyayîşî do bêrê kerdene. 17ê sibate de zî bi şîarê ‘Rayber Apoyî rê Azadîye’ Kolnê Almanya de rayraşîyayîşo merkezî do bêro kerdene. Ma venga rayaumûmîya dinya, pêro dezgehan, rêxistinan, sendîkayan, partîyan, aktîvîstan û demokratan danê ke tewrê rayraşîyayîşê Kolnî bibê.”
XWEBÛN
