KNK: Ganî statu û ewleyîya Êzidîyan bigêrîyê binê garantîyî

Qirkerdişê Êzidîyan hetê Elmanya ra bi resmî amebi şinasnayîş. KNKyî dîyar kerd ke, qerar muhîm o la ganî statü û ewleyîya Êzidîyan bigerîyê binê garantîyî.

Hetê Elmanya ra Qirkerdişê Êzidîyan bi resmî sey jenosîdî ame qebulkerdiş. Derheqê nê qerarî de hetê KNK(Kongreya Neteweyî ya Kurdistanî)yî ra malûmatêk ame dayene. Hetê KNKyî ra ame dîyarkerdiş ke, qerar muhîm o la heta ke statuya Şengalî û ewleyîya Êzidîyan megerîyê binê garantîyî, jenosîdî do dewam bikerê. 

Malûmatê KNKyî wina yo: “Badê Konseya Ewrûpayî û 10 dewletan ra, qirkerdişê Êzidîyan ê 2014î hetê Elmanya ra zî sey jenosîdî ame qebulkerdiş. Kongreya Neteweyî ya Kurdistanî nê qerarî muhîm vînena.

Vera şarê ma yê Êzidî, 2014î de hetê DAÎŞ û şerîkanê ci ra bi nîyetê qirkerdişî hêrîşî ameyê kerdene. Înan waşt bi nê hêrîşan Êzidîyan qir bikerê. Helbet nê hêrîşî tena hetê DAÎŞî ra nêameyê kerdene. Tayê dewletê mintiqa zî mîyan de bî.

Qerarê Meclîsa Elmanya muhîm o. La seba ke birînê Êzidîyan bêrê piştiş û problemê înan bêrê çareserkerdiş qîm nêkeno. 

Qirkerdiş hetê NYyî, YEyî û hetê sazîyanê mîyannetewîyan ra sey jenosîdî ame qebulkerdiş. Nê qerarî rast ê û muhîm ê. La bin ê halê xo nê qerarî tena qîm nêkenê. Seba ke jenosîdî tekrar mebê û zirar û zîyanê Êzidîyan telafî bibê, ganî bi goreyê prensîban qerarê bînî bêrê girewtene.

Ganî statu û ewleyîya Êzidîyan bigêrîyê binê garantîyî. KNK, seba ke probleme Êzidîyan bêrê çareserkediş sazîyanê mîyannetewîyan ra wazeno wa goreyê prensîbanê xo berpirsîyarîya xo cabiyarê û waştişanê xo rêz keno.

*Ganî Şengal de û welatanê bînan de ewlewîya Êzidîyan bigêrîya binê garantîyî
*Ganî îradeyê şarê Êzidîyî bêro qebulkerdiş û statuya resmî ya mintiqaya Şengalî bêra şinasnayîş
*Ganî DAÎŞ û hêzê ke sûcdar ê Dîwanê Edaletî de mehkema bibê.
*Êzidîyê Şengalî û cayanê bînan bi taybetî hêrîşanê dewleta Tirke ra bêrê pawitene.
*Seba ke Şengal newe ra bêro awankerdiş, projeya mîyannetewî bi rayberîya şarê Şengalî bêra dest pêkerdiş
*Seba ke Êzidîyî bieşkê agêrê erdê xo ser, ganî îmkanî bêrê peydakerdiş.”

MERKEZÊ XEBERAN