Kovara Jîneolojî: Ma ganî fikrê xoverdayîşî yê Nagîhane aver de berê

• Kovara Jîneolojîyî dîyar kerd ke hêrîşa ke Nagîhan Akarsele rê bîya, vera xoverdayîşê azadîye yê cinîyanê Kurdan ameya kerdene. 

Kovara Jîneolojîyî derheqê qetilbîyayîşê Nagîhan Akarsele de malûmato nuştekî da. Malûmatî de cinîyan û hereketanê şorişgeran rê gazîye ameye kerdene ke, mîrasê aye bêro pawitene, zanistê cinîyan û xoverdayîşê cinîyan bêro pîlkerdene û seba ke hêzê leyşinî yê qetlîamî eşkera bibê xoverdayîş bêro kerdene.

Malûmatê kovare wina yo: “Sere de Kurdistan û Rojhelato Mîyanên de xebata Jîneolojîyî şarî û cinîyî şorişî de ardê têhet. Serekanê na xebate ra Nahîhan Akarsele Silêmanîye de bi suîqestî ameye qetîlkerdiş. Jîna Mahsa Amînî ya Kurd a ke Îran de sîtemê camerdan ê desthilatdarî ver ameybî qetilkerdîşî ra dima cinîyî vejîyayê kuçeyan û wextêkî winasî de Nagîhane hetê eynî sîstemî ra ameye qetilkeldiş.

Bîye hefizaya Jîneolojîyî

Nagîhane pêroyê cuya xo de xoverdayîşê cinîyan de kede da û seba ke xebata Jîneolîyî aver de şêra û birasa cinîyanê dinya kedêka pîle daya. Nagîhane hem hetê fikrî ra hem hetê çalakîye ra rayîrê cinîyan roşn kerdo. Nagîhane bi keda xo bîya hefizaya tarîxê xoverdayîşî û jîneolojîyî. Dewleta netewî îradeyê cinîyan, bedenanê înan û nasnameyanê înan hedef gena û wazena bi şikitîşê xoverdayîşê komelkîyî koletîye cinîyan ser de bar bikera. Nagîhane nasnameyanê xo yê cinîtîye û Kurdîtîye ver ameya qetilkerdiş. Na hêrîşa vera Hereketê Azadîye yê Cinîyan ê Kurdistanî û xoverdayîşê ci ameya kerdene.

Ganî fikrê xoverdayîşî bêro kiriştene

Ma ewro ganî fikrê xoverdayîşî yê Nagîhane bipawê û aver de berê. Ma ganî ewro hêrsê xo dejê xo organîze bikerê. Ma ganî dormaleyê fikre jîaneolojîyî de şorişê cinîyan awan bikerê.

Gazîya xoverdayîşî

Ma sey Lijneya Weşanî ya Kovara Jîneolojîyî, hêrîşa ke şexsê Nagîhan Akarsele de vera şorişê cinîyan û azadîya cinîyan  bi plankerdî ameya kerdene bi hêrs şermezar kenê. Ma gazîya cinîyan û hereketanê şorişgeran kenê ke, wa mîrasê Nahîhane bipawê, zanistê cinîyan aver de berê û seba ke no qetlîam bêro zelalkerdiş xoverdayîşê xo pîl bikerê.

Nagîhan Akarsele rûmetê ma ya û bêmerg a!”

MA / AMED