DARA DEMÎRALP / BÎANET / ÇEWLÎG
Koyê Şerefdînî bi wareyanê xo yê rengînan timûtim koçeran rê bîyo cayêko muhîm.
Koyê Şerefdînî, koyê Kanîreşî yê Çewlîgî yo. Rojawan ra ver bi rojhelatî derg beno. Koyêko volkanîk o. Hetê çimeyanê awe ra zaf dewlemend o. Gola Berxan, Gola Bongilan û Gola Şêx Melek çend golê nê koyî yê.
Koyê Şerefdînî de xeylê wareyî estê. Wareyê ci yê tewr namdarî nê yê: Çalkavya, Bazirganan, Qendîl û Mêrgemîr.
Hetê başûrî yê Şerefdînî zaf xidar o. Hetê rojawan û rojhelatê Bongilanî de cayê rastî estê. Nê cayan de daristanê mazêrî estê. Bê mazêran, tuyêrî, qorçîyerî û gozêrî zî estê.
Koyê Şerefdînî Bakur de ver bi Çemê Heznawe û Çemê Baskanî nizm beno. Hetê bakurî de 3 koyî estê; başûrê Çemê Baskanî de Koyê Çapankî, ver bi hetê Xormekan Girêboxa, ver bi Gimgimî zî Koyê Leylege û peyê ci de zî Koyê Kurî.
Wexto ke wisar dîyeno, koçerî û şarê derûdorî benê mêmanê wareyanê Şerefdînî. Koyê şerefdînî bîyo wareyê kilamanê xeylê dengbêjan.
