Kûlû: Hêrîşî plankerde yê

yekşem 31 tîrmehê 2022 - 23:00

  • Hemserekê Komeleyê Elewîyan ê Demokratîkî Mûsa Kûlûyî: Hêrîşê ke bi hemdemî vera cemxaneyan ameyê kerdene, plankerde yê. Ma ganî pêro pîya xo ver bidê, eke nêbo hêrîşî zêdîyenê.

Enqarayî de cemxaneyî bi hemdemî raştê hêrîşan ameyê. Hêrîşî roja verêne ya Aşma Muharremî de ameyê kerdene û nê hêrîşan de cinîyêk bîye birîndare. Hêrîşî hetê Hemserekê Komeleyê Elewîyan ê Demokratîkî Mûsa Kûlûyî ra ameyê erjnayîş.

‘Engişte nîyaye gocage’

Mûsa Kûlûyî va, “Hêrîşê cemxaneyan tesadufî nîyê. Suleyman Soylû û Tayyîp Erdogan komele tehdît kenê. Verê weçînitişî wazenê kaosêk awan bikerê. Nê hêrîşî tena hetê çend beradayîyan ra nêameyê kerdene. 5 cayî raştê hêrîşan ameyê û no zî mojneno ma ke engişte nîyaya gocaga komployî. Sewbîna îzehetê xo çin o. 

Hêrîşa plankerdî

Derheqê hêrîşa roja verêne ya Aşma Muherremî de Kûlûyî va, “Roja verêne ya Muherremî, wextê cemî de hêrîşe yena kerdene. Fam beno ke, na hêrîşe bi zanayîş û plankerdî ameya kerdene. Ma ra vanê ‘Ma do nefes medê şima, ma şima û bawerîya şima nêşinasnenê, maş ima qebul nêkenê û şima tîmûtim hedefê ma de yê’. Nîya aseno ke nê hêrîşî do bizêdîyê. Ganî demokratî, welatperwerî û roşnvîrî verba nê hêrîşan de vinderê. Çimkî na hêrîşêka komelkî ya.”

‘Xeverdayîşêko pêro pîya’

Mûsa Kûlûyî peynî de va, “Ganî kes na meseleye de bêveng memano. Eke bêvengîyêk biba, do hêrîşkarî paştî bigerê û hêrîşî bizêdîyê. Eke xoverdayîşêko pêro pîya meyeno dayene, do faşîzmê Hîtlerî game bi game bêro. Eke nîya biramo do tarîx tekrar bikero. Her bawerî û nasnameyî têduşt ê. Ganî pêro nasnameyî bi qanûnan bêrê şinasnayîş û pawitiş. Eke nîya nêbo do nê hêrîşî normalîze bibê. Heta nasnameyê Elewîyan û Kurdan meyerê şinasnayîş, haştîye û demokrasî nînê nê welatî. Şima çi cayê dinyaye de benê bibê, wayîrê haştîye û demokrasîyî bivejîyê.”

MA / DÊRSIM

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.