‘Mekanê Duzgin Babayî sîlehanê şima ra nêterseno

• Hewt komeleyanê Elewîyan derheqê tehtîdkerdişê qeymeqamê Nazmiyeyî de va: Ne bawerîya Elewîyan ne zî mekanê Duzgin Babayî; hende zeîf û bêkokî nîyê ke di merdimanê wayîrê sîlehan ra bitersê.

Hewt komeleyanê Elewîyan derheqê tehtîdkerdişê qeymeqamê Nazmiyeyî de malûmatêk weşana û înan va, “Ne bawerîya Elewîyan ne zî mekanê Duzgin Babayî; hende zeîf û bêkokî nîyê ke di merdimanê wayîrê sîlehan ra bitersê.”

Qeymeqamê Nazmîyeyî Ugur Tutkanî, serekê cemxaneyî yê Duzgin Babayî Sînan Kirmiziçîçekî ra vatibi “Ma do qanûnî, hiquqî û qewetê dewlete bimojnê to û paştîdayoxanê to”. Nê vateyê qeymmeqamî mîyanê Elewîyan de ameyê şermezarkerdiş.

‘Ma do rêça xo ra şorê’

Hewt komeleyanê Elewîyan va ganî qeymeqam îftîfa bikero û înan bi sernameyê ‘Duzgin Baba pîrozîya ma yo’yî vilawekêk weşana. Vilaweke de înan vato:

“Mekanê Duzgin Babayî bi hezaran serra nat Nazmîye de yo qasê kehenîya merdimatî kehen o. Ma vînenê ke tayê qewetê tarîyî wazenê Elewîyan bi sîlehan bitersnê. No merdim tîya de dewlete temsil keno û zîhnîyetê dewlete dano teber. No heqeret fotografê rewşa Elewîyanê nê welatî yo. Zulme înan bi seyan serran o ke dewam keno. La ê çîyêkî xo vîrî ra kene, ma do çirey rêça x ora mevejîyê. Bawarîya ma hende pîl a ke kes nêşkeno aye bixeripno û no tena acizîya înan mojneno ra. Qeymeqam Ugur Tutkan ganî cade wezîfeya xo ra bêro girewtiş.”

Komeleyanê ke îmza eşta vilaweke nê yê:

Federasyonê Komeleyanê Elewîyan
Federasyonê Elewî û Bektaşîyan
Federasyonê Weqfanê Elewîyan
Konfederasyonê Yewîtîyanê Elewîyan yê Ewrûpayî
Weqfa Kultîrî ya Anadolûyî ya Hecî Bektaş Welîyî
Komeleyê Kulturî yê Elewîyan
Komeleya Kulturî ya Pîr Sultan Abdalî

PÎRHA / ENQERA