Kurd û Kurdistan ameyê tehrîfkerdiş

• Akademîsyen Firat Sozerî vano, çekuyê Kurd û Kurdistanî hetê xeylê weşanxaneyan ra ameyê sansurkerdiş. Kitabê Puşkînî yê Raywanîya Erzîromî hetê weşanxaneyê Îş Bankasîyî ra demêko derg ame tehrîfkerdiş.

MA / ÎSMET KONAK

Akademîsyen Firat Sozerî vano, çekuyê Kurd û Kurdistanî hetê xeylê weşanxaneyan ra ameyê sansurkerdiş. Kitabê Puşkînî yê Raywanîya Erzîromî hetê weşanxaneyê Îş Bankasîyî ra demêko derg ame tehrîfkerdiş.

Ajansa Mezopotamya akademîsyen Firat Sozerî de derheqê tehrîfkerdişê kitaban de roportajêk kerdo. Roportaj de Sozerî derheqê çekuyanê Kurdkî de zî malûmatanê balkêşan dano.

‘Ma pêro açarnayîşan de tehrîfat vînenê’

Firat sozerî derheqê tehrîfatî de vano, “Kitabê Puşkînî yê Raywanîya Erzîromî çend rey ameyo açarnayîş, hende tehrîf bîyo. Kitabanê Tirkî de ma vînenê ke zafê înan de çekuyê Kurd û Kurdistanî yene tehrîfkerdiş. No polîtîkayê dewlete yo. Xususen meseleyanê Ermenî û Elewîyan de tehrîfat zîha zede yo. Reyna ma vînenî ke kitabe Puşkînî de Ataol Behramoglûyî zî tehrîhat kerdo.

‘Ma kitabê Puşkînî sey orîjînalî açarna’

Sozerîyî va, “Ma kitabe Puşkînî sey orîjînalî açarna. Eynî roje weşanê Kulturî yê Vakifbankî bi açarnayîşê Eyup Karakûşî açarnayîşêk weşana la dima înan kitabî têpîya ant. Çîyêko winasî zî esto zaf balkêş o. Ma vînenê ke akademîsyen û entelektuelî zî wexto ke mesele bêro Kurdan, Ermenîyan û Elewîyan ser bi rehetî eşkenê tehrîfat bikerê. La reyna ma vînenê ke, wendoxan de vera tehrîfatî hesasîyetêk peyda bîyo. Hinî kitaban ser de tehrîfat bi asanî nîno kerdene. Xususen ma metnanê ke wextê Sovyetan de derheqê Kurdan de ameyê nuştişî de zaf tehrîfatan vînenê. Ma do hema nê wareyî de xeylê xeletîyan raşt bikerê.”