Vateyê verênî yê Yaşar Kemalî ame tehrîfkerdiş

Yaşar Kemal kitabo ke derheqê Yorukan de ameyo nuşteneyî rê vateyêko verên nuşto la burokratan vato “Elewîyî Kurd nêbenê” û îfadeyê Yaşar Kemalî kitabî ra ameyê vetene.

Ulla Johensen a Almane 1957î de ameya mîyanê Yorukan de 7 aşmî menda û dima înan ser o kitabêk nuşto. Vateyê verênî yê nê kitabî hetê Yaşar Kemalî ra ameyo nuştene. Wezaretîya Kulturî semedê vateyê Kemalî yê “Kurdê Elewîyî” vana çîyêko winasî nêbeno û Elewîyî nêşkenê etnîsîteyan ser o bêrê terîfkerdiş û wazena nê îfadeyan kitabî ra veja. Yaşar Kemal nê çîyî qebûl nêkeno û kitab do bê vateyê verênî çap bino. Yaşar Kemalî heta nika behsê nêyî nêkerdo. Taner Talaşî mesele ser o nuşteyêk nuşto.

Vera di çekuyan bêtehmulîye

Ulla Johensen xebata xo bi îngîlîzî çap kena la heta 1999î Tirkîya de nêameyo aqil ke no kitab bêro çapkerdiş. Badê tayê kesan waşto çap bikerê la bêîmkanîyê ra nêbîyo. Nika zî kitab çap beno la bê vateyê verênî. Seba ke Yaşar Kemalî vato, “Kurdê Elewîyî” vateyo verên kitabî ra ameyo vetiş. Çîyo balkêş no yo ke çapemenî de derheqê nê tehrîfatî de çîyêk nênusîyayo. No vateyo verên, kitabo Yaşar Kemalî yo ke bi nameyê “Bexçeyo Hezar û Yew Vilikin”î  de çap bîyo.

MERKEZÊ XEBERAN