Kursanê Birca Beleke rê eleqayo pîl

• Komaleya Ziwan û Kulturî ya Birca Beleke de kursê neweyî bi elaqeyo pîl dest pêkerdê.

Komaleya Birca Beleke, 2019î de Cizîr de dest bi xebatanê xo kerd. Pandemîyî ver komele mabên dabi xebatanê xo û nika kursê kutur û hunerî yenê dayene. Kursê Kurdkî, gitar, erbane û tembûrî nika komele de yenê dayene. Înan dayo xo ver ke, xeylê kursê bînî zî do bêrê akerdene.

Hemserekê komeleye Cahît Akîl, mamosta Haci Ozmen û kursiyer Mehmet Dargayî derheqê kursan de erjnayîşî kerdê.

Kursî dest pêkerdê

Hemserekê komeleye Cahît Akîlî dîyar kerd ke kursan rê eleqayo pîl esto û va, “Ma komeleya xo 2019î akerde. Pandemîyî ver xebatê ma zeîf mendê. Kongreya ma ya peyine ra dima vera komeleye elaweyê şarî zêdîya. Kongre ra dima xebatê ma yê ziwanî dewam kerdê. Nika asta 1ine ra heta asta 3yine kursê ziwanî yenê dayene. Derheqê kultur û hunerî de kursê ma estê û qeydê ma dewam kenê. Nika kursê gitar, erbane û tembûre yenê dayene. Ma şarê x ora vanê wa bêrê nê kursan ra îstîfade bikerê û wa ziwan û kulturê xo bimusê.”

‘Ma pêroyê qezayan ra qeydan genê’

Akîlî va, “Ma nika seba kursê tîyatroyî zî qeydan genê. La hema kursê tîyatroyî dest pênêkerdo. Ma do komêka dengbêjan awane bikerê. Xebatê ma dewam kenê. Ma Silopya, Dergul û qêzayanê bînan ra zî heta Şirnex ra zî qeydan genê. Ma wendekaran ser ra xo rasnanê wendekaranê bînan. Wa ciwanî wayîrê kultur û ziwanê xo bivejîyê.”

‘Ma wayîrê ziwanê xo bivejîyê’

Kursîyeranê komeleye ra Muhammed Dargayî va, “Ma mekteban de nêşkenê bi ziwanê xo perwerde bigerê. Ma seba ke ziwanê xo de perwerde bigerê ameyê tîya. Ganî pêro ciwanî wayîrê ziwan û kulturê xo bivejîyê. Ma ziwanê xo qisey kenê la hetê nuştişî ra kêmanîyê ma estê. Seba ke ma nuştiş zî bimusê ma ameyê. Herinda ke ma şorê kafeyan ma ziwanê xo bimusê.”

‘Berê ma akerde yo’

Perwerdekarê gîtarî Haci Ozmanî va, “Ma dersanê gîtarî rojanê yewşemeyan danê. Ma wazenê tîya de koroyêk awan bikerê. Nika 15 wendekarê ma estê. Kesê ke wazenê gitar bimusê eşkenê bêrê kursanê ma. Berê ma her kesî rê akerde yo.”

MA/ŞIRNEX