‘Kurdî nêşkenê Efrîn de Kurdkî qisey bikerê’

Mahmut ALTINTAŞ / MA / DÎLOK

Kamber Taş o ke sînorê Efrînî de cuwîyeno dîyar kerd ke Efrîn ameyo erebkerdene û Kurdî nêşkenê Kurdkî qisey bikerê.

Tirkîya, 20ê Çeleyî yê 2018î de bi paramîlîteranê xo hêrişê Efrînî kerd û hêrişan ver Kurdan bar kerd û herinda înan de erebî ameyê cakerdene. Xozaya bajarî ameye talankerdiş û darê zeytunan ameyê wekerdene. Sûcê tecawiz, remnayîş û fîdyeyî zêdîyayê. Derûdorê bajarî bi telan ame girewtene. Nameyê mehla, dewe, cehde û kuçeyan çarîya Erebkî û Tirkî.

Hêrişan ra dima xeylê Kurdan bar kerdo ameyê mehleya Kazikliyî yê qezaya Dîlokî ya Islahîye. Kesanê ke bar kerdo vanê ke ê nêkenê şorê merdimanê xo bivînê.

‘Kurdî nêşkenê Kurdkî qisey bikerê’

Kamber Taşî dîyar kerd ke keyeyê înan Efrîn ra verê bîyayîşê ey bar kerdo ameyo Islahîye. Taşî dîyar kerd ke ê nika nêşkenê şorê merdimanê xo yê Efrînî bivînê û va, “Ez merdimanê xo reyde bi telefon qisey kena. Mi ra vanê ke ê nêşkenê tebera Kurdkî qisey bikerê. Ê zî êrdîşe verdenê û erebkî qisey kenê. Vanê ma çeteyan ra tersenê. Keyeyê şarî ameyê îşxalkerdiş, zeytunêrî ameyê birnayîş û zulim şarî ser de yeno ramitene.”

‘Sînor nêşkeno bikewo mabênê ma’

Taşî bale ante sînoran ser û va, “Tîya cografyaya Kurdan a. Qet yew cayê dinya de nê sînorî çin ê. Uca zî erdê Kurdan o, tîya zî. Sînorî nêşkenê bikewê mabênê ma. Kesê ke biewnê nê sînoran ra rastîye vînenê. Heqê Tirkîya Efrîn de çin o. Efrîn ameyo îşxalkerdiş. Dinya de edelet çin o. Ez wazena şorî erdê kalikanê xo la ez nêşkena şorî.”

‘Efrîn erdê Kurdan o’

Taşî dîyar kerd ke demografîyê Efrînî ameyo vurnayene û va, “Efrîn cayê Kurdan o la Erebî Efrîn de ameyê cakerdene. Ê nêşkenê Efrînî bikerê cayê Ereban. Man ê zulmî qebûl nêkenê. Ganî ê Efrîn ra bivejîyê û do bivêjîyê. Ganî Kurdî bibê yew û paştî bidê yewbînî.”