‘Ma do 14ê Gulane de hesab bipersê’

• Hemverfekanê Partîya Çep a Keske û Hemserekê HDPyî yê Amedî dîyar kerd ke, ê se kenê bikerê do sermekewê.

128ê kesê ke gêrîyaybî binê çimî, înan ra 28 kesî ameyê girewtene û 31 kesî ameyê veradayîş. Hemverfekê Partîya Çep a Keske yê Amedî Pinar Sakik Tekîn û Abbas Şahîn û Hemserekê HDPyî yê Amedî Gulîstan Atasoy û Zeyyat Ceylanî rewşe erjnaye û dîyar kerd ke, weçînayîşî de hesab bêro perskerdiş.

‘Îradeyê şarî do qezenc bikero’

Hemsereka HPDyî ya Amedî Gulîstan Atasoye va, “Şarê ma do hesabê nînan 14ê Gulane de biperso. Sey îqtîdaranê bînan ê ke vera kurdan dişmenetî kerdêne, AKP-MHP zî do layiqê xo bivînê. Îradeyê şarî do timûtim serbikewo. Haştîwazî, heqperestî û demokratî do serbikewê.”

‘Se kenê wa bikerê do qezenc mekerê’

Hemserekê HDPyî yê Amedî ZeyyatCeylanî zî va, “Îqtîdarê AKP-MHPyî do vîndî bikero. Zana ke vîndî keno, dest bi kayan kerd. Verî cû kaos vet, waşt weçînayîşî bigero û girewt. La dima ame teşhîrkerdiş. Şar hinî AKP-MHPyî şinasneno. Awiqatî gêrîyayê binê çimî, hezar awiqatan herinda înan de soz da. Hunermendî do paştî bidê. Rojnamegerî ameyê girewtene û wazenê şar heqîqetan mezano. La bi seyan rojnamegerî teber de yê. Coka ê se kenê wa bikerê do meeşkê qezenc bikerê. Nêşkenê verê hêza ma bigerê. Ma do 14ê Gulane de pêro pîya nê zulmî biqednê û raya azadîye akerê.

MA / AMED