‘Ma do sîyabestişê xo bikerê sebebê xoverdayîşê xo’

Cinîyê TJAyî Semsûr de cinîyan reyde ameyê têhet û înan va, “Ma do sîyabestişê xo bikerê sebebê xoverdayîşê xo.”

Endamê TJAyî û Meclîsa Cinîyan a HDpyî, Semsûr de cinîyan reyde ameyê têhet. Hetê înan ra kona cinîyan ameye ronayene. Înan Meclîsa Cinîyan a DADî û fenînîstan reyde pîya malûmato çapemenîye da.

Bi nameyê TJAyî hetê Rozerîn Îldane ra malûmat ame wendene. Aye dîyar kerd ke, ê do sîyabestişî bikerê sebebê xoverdayîşî û va, “Verê erdlerzan nîno girewtene la bi tedbîran xisar eşkeno bêro kêmkerdiş. No îqtîqar ten abi polîtîkayanê şerî, bi dişmenetîya vera Kurdan û cinîyan rayra şono û seba ke tena menfaatê xo fikirîyeno, bajaranê erdlerze de koordinasyon nêameyo ronayene.”

‘Ma do cuye newe ra awan bikerê’

Îldane va, “Roja verêne ra nat ma mintiqaya erdlerze de yê. Xebatê ma bi ruhê paştîdayîşî dewam kenê. Ewro ra têpîya zî ma do sey TJAyî mintiqayanê erdlerze de xebatanê xo biramnê û ma do bi cinîyan reyde cuye newe ra awan bikerê. Ma do bajaranê xo û cinîyan wîjdanê dewlete rê meverdê. Ma do alternatîfanê xo pîya awan bikerê. Ma cinîyî do timûtim xoverdayîşê xo biramnê.”

Malûmatî ra dima, hetê endamanê TJAyî ra kolîyê hetkarîyî ameyê vilakerdiş.

Riha de zî hetê cinîyan ra seba 200 keyeyan kolîyê hîjyenî ameyê hedrekerdiş. Endamê TJAyî, Meclîsa Dayîkanê Haştîye û Parlamentera HDPyî ya Rihayî Ayşe Surucu zî bîyê beşdarê hedrekerdişê kolîyan. 

MA / SEMSÛR / RIHA