Meletî de protestoyê molozî

Molozê bînayanê ke erdlerze de rijîyayê mintiqaya Mamurekî de yenê rokerdene. 

Molozê bînayanê ke Meletî de erdlerze ver rijîyayê mintiqaya Mamurekî de yenê rokerdene. Dewijan nêwaşt molozî tîya de bêrê rokerdiş la reyna zî molozî kirişîyenê tîya. Hetê HDP, MAL-ÇEP û dewijan ra tîya de malûmatêk ame dayene.

Parlamenterê HDPyî yê Edeneyî Kemal Pekozî va, “Îqtîdar seba ke malîyetê wedartişê enkazî bifîno, molozan waranê cuye ra nêzdî rokeno. Sihetê merdiman do bikewo taluke û rence û weyekerdişê heywanan rê do tesîrê xo bibê. Dewî do mîyanê tozî de bimanê. Hem sihetê însanan do bikewo taluke hem zî psîkolojîyê înan do bandor bigero. No îqtîdaro zordar tena malîyetî fikirîyeno. Nê molozî ganî bikirîşîyê gêlîyanê ke dûrî de yê. La seba ke malîyetî fikirîyenê, kişta bajarî de mîyanê dewan de nê molozî yenê rokerdiş.”

‘No qirkerdişo ekolojîk o’

Hemvervekê Platformê Derûdorî yê Meletîyî(MAL-ÇEP) Ramazan Derînî va, “No qirkerdişo ekolojîk o. Mintiqa waranê cuye ra nêzdî ya. Na mintiqa zaningehî ra nêzdî ya. Şima nêşkenê molozî erazîyanê rence de rokerê. Ma do prosese hiqûqî bidê dest pêkerdene. Ganî sihetê însanan û xoza bêro fikirîyayîş.”

MA / MELETÎ