Amed de rijnayîşê bînayanê xisarênan giran şino

Hemserekê Odaya Muhendîsanê Înşaatî yê Amedî Mahsûm Çîya Korkmazî derheqê babete de ANFyî rê tayî erjnayîşî kerdî.

Hemserekê Odaya Muhendîsanê Înşaetî ya Amedî Mahsûm Çiya Korkmazî da zanayene ke Amed de 3 hezar û 200 bînayê xesarênî estê û têna 80ê ci ameyê rijnayene.

Korkmazî îfade kerd ke qezayanê Amedî de 80 hezar bînayan de xisar ameyo tesbîtkerdene labelê îtîrazan ser o no proses reya diyine ameyo kerdene. Korkmazî vat: “Coka proses bîyo derg. Karê tesbîtkerdişî mengêke û nême ra verî qedîya. Goreyê tesbîtan 3200 bînayî bi xisar ê. Îhaleyê rijnayîşê nê bînayan hêverî dîya Şaredarîya Amedî la dima dîya walîtîye. Seba rijnayîşê taxan îhale ame kerdene û no îhale zî 10 rojî verî qedîya. Nika ganî bînayî bêrê rijnayene.”

Korkmazî da zanayene ke karê rijnayîşî zaf giran yeno kerdene. Korkmazî vat: “Heta nika têna 80 bînayî ameyê rijnayene. Eke wina dewam bikero karê rijnayîşî bi serran do nêqedo. Nê bînayê xisarênî cayê trafîkî de yê, wayîrê rîskanê pîlan ê. Kolonê înan teqayê. Bi lerzayîşêkê qijî yan zî bi trafîkê wesayîtan zî nê bînayî beno ke birijîyê. Karê rijnayîşî ganî goreyê îdarenameyê rijnayîşî yê Wezîrîya Dorme û Şaristanîye bêrê kerdene. Nê îdarenameyî de bi zelalî yeno vatene ke ganî qatanê cêrinan ra rijnayîş dest pênêkero. Labelê ma vînenê ke eqsê ney hêverî kolonê qata cêrine yenê teqnayene û bîna wina yena rijnayene. Ê kenê ke tehlukeyêkî wedarnê la tehlukeyêkê bînî afernenê.”

MERKEZÊ XEBERAN