‘Ma Partîya Çep a Keske de bêrê têhet’

Îttîfaqê Demokrasî û Azadîye yê Kurdan deklarasyonê xo yê weçînayîşî qezaya Pêyasî ya Amedî de bi kombîyayîşêkî eşkera kerd.

Îtîfaqê Demokrasî û Azadîye yê Kurdan deklarasyonê xo yê weçînayîşî de veng da ke wa şaro kurd Partîya Çep a Keske de bêro têhet.
Deklarasyon de verî bale ameye antene Erdlerzê 6ê Sibate ser û ame îfadekerdene de erdlerz de dewlete erkê xo nêardê ca û peygoşîya dewlete ra qetlîyamêk qewimîyayo.

Deklarasyon de ame parekerdene ke nê prosesê weçînayîşî de polîtîkayê înkar û îmha yê vera kurdan bi hawayêkê tewr giranî dewam kenê û şerê vera kurdan bîyo sebebê krîzanê Tirkîya zî. Yew zî ame vatene ke weçînayîşê 14ê Gulane seba çareserîya meseleya kurdan firsendêk o la ganî Îtîfaqê Miletî seba paştdayîşê kurdan hêverî cewab bido waştişanê kurdan. Oncîna deklarasyon de ame îfadekerdene ke Îtîfaqê Demokrasî û Azadîye yê Kurdan wazeno ke heq û waştişê kurdan bêrê caardene û berê çareserîya meseleya kurdan bêro akerdene.

Deklarasyon de wina ame vengdayene : “Îtîfaqê ma vera qeyûman têkoşînê xo rê do dewam bikero. Îtîfaqê ma xoverdayîşê Jin, Jiyan, Azadî yê cinîyan ê kurdan selam keno. Îtîfaqê ma teda û înkarê vera kurd, ereb, armenî, asûrî, azerî û tirkmenî û teda û înkarê vera elewî, sunî, êzidî, xirîstîyan û musewîyan zî red keno. Îtîfaqê ma wazeno wa tecrîdê vera Birêz Ocalanî bêro wedaritene. Îtîfaqê ma wayîrê destkewteyanê şarê ma vejîyeno. Îtîfaqê ma venga şarê ma dano ke dormeyê Partîya Çep a Keske de bêro pêser û 14ê gulane de raya xo bido ci.”

XWEBÛN