Nêweşo giran Mehmet Emîn Ozkan tehlîye bi

Mehmet Emîn Ozkan 27 serrî yo hepis de bi û zere de xeylê nêweşîyî girewtê.

Nêweşo giran Mehmet Emîn Ozkan(84) 27 serran ra dima tehlîye bi. Goreyê malumatan 13yê Temûze de wedarîya nêwweşxane. Bi kelemçeyam tedawîyê ci ame kerdene. Keynaya ci dîyar kerd ke roşanî ra dima pîyê ci panc rey wedarîyayo nêweşxane. Hetê dozgerîye ra ameyo dîyarkerdiş ke do bêro veradayîş.

27 serrî yo hepis de yo

Girewteyo nêweş Mehmet Emîn Ozkan lîsteya ÎHDyî de bi. 1993yî de Licê de Tuggeneral Bahtîyar Aydin amebi kiştene û Ozkan berbirsîyar amebi ramojnayene. 1996î de Mersîn de ame girewtene û cezaya muebbetî dîayaye ey. Dima 2 şahidan dîyar kerd ke îfadeyê înan bi îşkence ameyo girewtene. Derheqê dewa de AÎHMî qerarê binpaykerdişî da. Qerar ame girewtene ke dewa do newe ra bêra vînayene. Dewaya Ozkanî 2014î ra nat dewam kena. Ozkanî hepis de xeylê nêweşîyî girewtê. Nêweşxaneyê Gazî Yaşargîlî 2015î de derheqê ey de rapor dabi û goreyê raporî ganî hepis ra bivejîyayêne. La paroranê ATKyî ver Ozkan nêameyêne tehlîyekerdiş.

MA / AMED