Dewleta tirke Şakîr Turan qetil kerd

Tepişteyo nêweş o 70 serrî Şakîr Turan rixmê nêweşîya xo vera nêdîya û nêweşxane de dinyaya xo bedilnaye. Dewleta tirke qestî eleqedar nêbîye û Turan qetil kerd.

Turan rixmo ke hewteyêk o nêweşxane de bîbî xebere nêdîyaye keyeyê ci. Lajê Turanî Abdurrahman Turanî da zanayene ke tepişteyanê bînan xebere daya keyeyî û 25ê tebaxe de o şîyo nêweşxane.

Abdurrahman Turanî pare kerd ke destûr nêdîyayo ke o babîyê xo bivîno û doktoran zî agahîyêke nêdaye ci. Turanî vat: “Muracatê avûkatan ser o mi 28ê tebaxe de babîyê xo dî. Wexto ke newe kewtbî zîndan, o 75 kîlo bîbî la wexto ke mi o dî, babîyê mi 40 kîlo bî. O nêeşkayêne qisey bikero û pê zorî qisey kerdêne. Nêverdayêne ke ma hetê babîyê xo de bimanê.

Babîyê mi bodrumê nêweşxaneyî de tepişîyayêne û 6-7 cendirmeyî serê ey de vindertêne. Mi waşt ez puncan bida ey ra la cendirmeyan nêverda. Babîyê mi yew bi yew ma ra xatir waşt û vat ‘Miqatê xo bê, yew bê. Sereyê mi berz o, mi apey gamêke nêeşte.’ ”

Cenazaya Turanî do qezaya Stewrî ya Mêrdînî de bêra definkerdene.

Şubeyê Amedî yê OHDyî 28ê temmuze de seba ke Turano nêweş vera nêdîyabî nêrazîbîyayîşê xo mojnabî.

Lajê Şakîr Turanî adara 2023yî de Parlamenterê HDPyî Omer Faruk Gergerlîogluyî de pêvînayîş kerdbî. Gergerlîogluyî rewşa Turanî ser o pêşnîyazê persan dabî Wezîrîya Edaletî la pêşnîyaz nêamebî qebulkerdene.

XWEBÛN