‘NÎSKO’ hedreyîya vejîyayîşê sehneyî keno

• Tîyatroyê domanan o Kurdkî Nîsko do vejîyo sehneyî ser. Dêrhenere Rewşan Apaydine dîyar kerd ke armancê kayî vernîyê asîmîlasyonî girewtiş o.

Derhênera Nîskoyî Rewşan Apaydine û kaykerdoxan Gulan Tura, Kadafî Unal û Mustafa Alordekî deerheqê kayî de qisey kerd.

Derhênera kayî Rewşan Apaydine va, “Nîsko maneno ‘domano engişte’ yê Estanikanê Andersenî. Nîsko zî qasê hebê nisk o. Nisko bi pîyê xo reyde şono hêga û uca de mîyanê xoza de qijkekîya xo ferq keno. Kayê domanan ê bi Kurdkî xeylê kêmî yê. Ma waşt hem vernîyê asîmîlasyonî bigerê hem zî domanê Kurdî wa bieşkê bi şayîye kayêk temaşe bikerê.”

Kaykerdoxanê kayî ra Gulan Tura va, “No kay seba ke Kurdkî yo, zaf erjaye yo. Mi wexto ke kay kerd, ez zaf pê bîya şa. Tîyatro domanan ser de bandoranê pozîtîfan keno. Domanî do bi ziwanê xo kayêk temaşe bikerê û wextêko weş bivîyarnê.”

Kaykerdoxan ra Mustafa Alordekî va, “Kay zaf samîmî yo û zaf baş ameyo nuştene. Qereqterê Nîskoyî domananê Kurdan temsîl keno. Kayê ma kayê domanan o la pîlî zî eşkenê bêrê temaşe bikerê.”

Do cesaret bido domanan

Kayderdox Kaddafî Unalî zî va, “Ma wazenê bi kayê xo ziwanî û xozaye bide domanan. Ma wazenê bi kayê xo cesaret bide domanan. Domanê Kurdan derheqê qiseykerdişê ziwanê xo de raştê astengîyan yenê. Ma verî cû şewa estanikan viraştibî. Domanan ra yew şibi pîy û maya x ora vatibi, şima çira Kurdkî nêmusnenê ma. Ma kayanê xo bi Kurdkî hedre kenê ke, derheqê ziwanê dayîke de domanan de hişmendîyêk peyda bibo.”

MA / ÎSTANBÛL